Sý máselesi boiynsha ótetin memleketaralyq kelissózderde Qazaqstannyń múddesin tabandy qorǵaýǵa negizdelgen Sý keńesi qurylady. Ekologiia, geologiia jáne tabiǵi resýrstar ministrligi osyndai bastama kóterip otyr, habarlaidy QazAqparat.
Vitse-ministr Serik Qojaniiazov Ortalyq kommýnikatsiialar qyzmetinde ótken brifingide atalmysh keńesti QR Premer-Ministri basqaratynyn málim etti.
Onyń aitýynsha, vedomstvo sý resýrstary salasyndaǵy ahýaldy jaqsartý úshin birneshe sharany josparlap otyr.
«Birinshi, memleketaralyq ózara qarym-qatynastardyń asa mańyzdy máseleleri boiynsha sheshimder ázirleý úshin kelissózder protsesterindegi Qazaqstannyń ustanymyn kúsheitý úshin QR Premer-Ministriniń basshylyǵymen sý keńesi qurylmaqshy.
Bul keńestiń negizgi mindeti syrtqy sý saiasatyn ázirleý barysynda Úkimettiń barlyq quramynyń is-qimylyn úilestirý bolady», - dedi ministrdiń orynbasary.
Sondai-aq, ministrlik sý resýrstary komiteti men onyń basseindik inspektsiialaryn kúsheitýge jol ashpaqshy.
«Sý resýrstaryn basqarýdyń qoldanystaǵy júiesi birinshi kezekte sý sharýashylyǵy qurylystaryn qaita jańartý jáne salý jónindegi jobalardy iske asyrýǵa baǵyttalǵan. Sý resýrstaryn esepke alý, sý únemdeý, taldaý jáne jaǵdaidyń damýyn boljaý siiaqty máseleler tiisti nazardan tys qalyp keledi. Basseindik inspektsiialardy sý resýrstaryn memlekettik basqarýdyń negizi retinde qaraý qajet», - dedi ol.
Aitýynsha, inspektorǵa túsetin júkteme tym aýyr.
«Búginde basseindik inspektsiianyń bir qyzmetkeri 93 aýyldyq eldi meken ornalasqan 41 myń sharshy qashyrym aýmaqqa qyzmet kórsetedi. Basseindik inspektsiialardy materialdyq-tehnikalyq qamtamasyz etý deńgeii ózekti bolyp tabylady», - dedi Serik Qojaniiazov.
