Úkimet "2022-2024 jyldarǵa arnalǵan respýblikalyq biýdjet týraly" zań jobasyn maquldady, dep habarlaidy Sputnik Qazaqstan.
Qarjy ministri Erulan Jamaýbaevtyń aitýynsha, zań jobasy halyqtyń ál-aýqatyn jaqsartýdy jáne ekonomikany birtindep qalpyna keltirýdi kózdeidi. Qazirgi boljam boiynsha kelesi jyly biýdjetke túsetin qarjy 431 milliard teńgege ulǵaiady. Osylaisha jalpy kólemi 13 trillionǵa jetedi. Sonyń ishinde munaidan basqa salalardan alynatyn túsimderdi barynsha arttyrý josparlanǵan. Al munaidan túsetin aqshany Ulttyq qorǵa kóbirek salý qajet. Sondyqtan qordan alynatyn qarajattyń kólemi birtindep azaiady.
"Kelesi jyly Ulttyq qordan kepildendirilgen transfert 2,4 trillion mólsherinde bolady. Ol birtindep 2024 jyly 2 trillion teńgege deiin tómendeidi", - dedi Jamaýbaev úkimettiń búgingi otyrysynda.
Al transfertterdi eseptemegende respýblikalyq biýdjettiń túsimderi 2022 jyly 9,2 trillion, 2023 jyly 9,7 trillion, al 2024 jyly 10,4 trillion teńgeni quraidy.
"Biýdjet tapshylyǵy 2022 jyly jalpy ishki ónimniń 3,3 protsentinen kezeń-kezeńimen 2024 jyly jalpy ishki ónimniń 2,5 protsentine deiin tómendeidi degen jospar bar. Al shyǵystar 2022 jyly 577 milliard teńgege ulǵaia otyryp, 15,9 trilliondy quraidy", - dep atap ótti Jamaýbaev.
Ministr áleýmettik salaǵa bólinetin biýdjet qarjysy sol kúiinde saqtalatynyn erekshe atap ótti. Onyń kólemi barlyq shyǵystyń 50 protsentin quraidy.
"Osylaisha kelesi jyly 2021 jyldyń biýdjetine qaraǵanda áleýmettik shyǵystar 515 milliard teńgege óse otyryp, 8 trillion teńge kóleminde josparlandy. Shyǵystyń ósýi jyl saiynǵy indeksteýge, zeinetaqy men járdemaqy alýshylardyń kóbeiýine, sondai-aq muǵalimder men dárigerler jalaqysynyń kóterilýine bailanysty bolyp otyr", - dedi Jamaýbaev.
Ministrler kabineti zań jobasyn biraýyzdan maquldady. Endi qujat Parlament Májilisiniń qaraýyna engiziledi.
