Búgin Qazaqstan Respýblikasynyń Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda ortalyq jáne jergilikti atqarýshy organdardyń 2019 jylǵy sý tasqyny kezeńine daiarlyǵy máselesi qaraldy, dep habarlaidy "Ult aqparat".
Mysaly, QR Ishki ister ministrligi jergilikti atqarýshy organdarmen birlesip, kóktemgi sý tasqyny kezeńinde tótenshe jaǵdailardyń týyndaý qaýpin tómendetý boiynsha is-sharalar keshenin júrgizýde.
«Sý basýdyń aldyn alý maqsatynda jergilikti atqarýshy organdar eldi mekenderden 3 mln tekshe metrden astam qar shyǵardy, janar-jaǵarmai, inertti materialdar, qap jáne jarǵyshtar qory ázirlenýde. Tótenshe jaǵdailar rezervinde jáne kezek kúttirmeitin shyǵystar rezervinde 17,7 mlrd teńge qarastyrylǵan. Sý tasqyny jaǵdaiynyń yqtimal kúrdelenýine jedel den qoiý maqsatynda jalpy sany 15 myń adamnan jáne 2 myńnan astam tehnikadan turatyn ishki ister organdarynyń kúshteri men quraldarynyń arnaiy toby quryldy», — dedi ishki ister ministri Q. Qasymov.
Sonymen qatar, azamattyq qorǵanystyń áskeri bólimderi tehnikamen, qural-jabdyqtarmen jete jaraqtaldy jáne arnaiy operatsiialarǵa qatysýǵa daiyn. Ótken jyly qutqarý jáne ózge de kezek kúttirmeitin jumystardy júrgizý úshin respýblikalyq jáne jergilikti biýdjetter esebinen arnaiy sý jinaý qurylǵylary, jaraqtar qosymsha satyp alyndy. Jekelegen óńirlerde sý tasqynynyń yqimal kúrdelený jaǵdaiyna azamattyq qorǵaýdyń qutqarý bólimsheleriniń kúshteri men quraldaryn qosymsha aýystyrý máseleleri pysyqtalýda.
Azamattyq qorǵaý júiesiniń kúshteri men quraldaryn, basqarý organdarynyń is-qimyldaryn praktikalyq mashyqtaý 26–27 aqpanda «Kóktem-2019» respýblikalyq komandalyq-shtabtyq oqý-jattyǵý barysynda júzege asyrylatyn bolady.
2017 jyldan bastap Sý tasqyny qaýpiniń aldyn alý jáne joiý jónindegi jol kartasy iske asyrylýda. Kartada eldi mekenderdi sý basýdan qorǵaýdy kózdeitin 637 is-shara qamtylǵan.Is-sharalardyń kópshiligi — 611 jergilikti atqarýshy organdardyń quzyryna jatady. 2 jylda 22,5 mlrd teńge somasyna 357 is-shara iske asyryldy. 174 qorǵaý bógetin salý jáne nyǵaitý, 119 gidrotehnikalyq qurylysty, sý ótkizý qabileti joǵary 64 kópirdi jóndeý jumystary júrgizildi.
Q. Qasymov sý qoimalarynda bos kólem qalyptastyrý máselelerine kóńil bólý qajet ekenin atap ótti. Bul ózenderdiń qaýipsiz deńgeiin retteý múmkindik beredi. Budan ózge, josparlarǵa túzetýler engizip, avtomobil jáne temirjol ýchaskeleriniń sý basýdan aldyn alý boiynsha qosymsha sharalaryn qabyldaý qajet.
Óz kezeginde, Indýstriia jáne infraqurylymdyq damý ministri J. Qasymbek respýblikalyq mańyzy bar avtomobil joldaryn sý tasqyny kezeńine daiyndaý maqsatynda Is-sharalar jospary bekitilgenin atap ótti. Ortalyq jáne óńirlik deńgeilerde Avtomobil joldary komitetiniń, «QazAvtoJol» UK» AQ, «Qazaqavtojol» JShS ókilderinen, sondai-aq olardyń oblystyq filialdarynyń ókilderinen sý tasqynynyń aldyn alý jóninde komissiialar quryldy.
Biylǵy 1 aqpannan bastap táýliktik kezekshilik uiymdastyryldy jáne kún saiyn joldar men jol qurylystaryn patrýldeý júrgizilip, sý tasqyny qaýpi bar ýchaskeler men kópirler baqylaýǵa alynatyn bolady. Mundai ýchaskelerge qajetti jol tehnikasy bekitiledi. Sý tasqyny kezeńine ýaqytyly daiyndyqty uiymdastyrý úshin bekitilgen Is-sharalar josparyna sáikes qajetti janar-jaǵar mai, jol materialdary jáne temirbetondy konstrýktsiialar qory qurylyp jatyr.
«Temir joldardy jáne jasandy qurylymdardy sý tasqyny kezeńine ýaqytyly daiyndaý maqsatynda "Qazaqstan Temir Joly" UK" AQ buiryǵy bekitilýde. Poiyzdar úzdiksiz jáne qaýipsiz júrýi úshin 1 naýryzǵa deiin ońtústik óńirde, 15 naýryzǵa deiin batys jáne shyǵys óńirlerde, al 1 sáýirge deiin soltústik aimaqta qajetti materialdar men konstrýktsiialar tielgen 42 arnaiy poiyz daiyndalatyn bolady», — dedi J. Qasymbek.
Energetika ministri Q. Bozymbaev elimizdiń energetikalyq kásiporyndary sý tasqyny kezeńine daiyndyqty qamtamasyz etý maqsatynda 2 myńnan astam arnaiy tehnikamen jabdyqtalǵan jedel brigadalar qurǵanyn atap ótti. Qaptaǵy inertti materialdar 56 myń dana, jana-jaǵarmai qory 360 myń tonnany quraidy.
2018 jyly Qazgidromettiń gidrologiialyq boljamdardy ázirleý júiesinde túbegeili ózgerister boldy. Qazgidromet 2019 jylǵy 1 naýryzdan bastap sinoptikalyq boljamdar negizinde apta saiyn negizgi gidrologiialyq boljamdar usynatyn bolady. Osy boljamdar gidrometeorologiialyq jaǵdai kúrt ózgergen kezde, árbir 3 kún saiyn naqtylanady.
Aýyl sharýashylyǵy ministrliginiń Sý resýrstary komitetiniń tóraǵasy I. Ábishev josparǵa sáikes 2017–2025 jyldar kezeńinde ortalyq jáne jergilikti atqarýshy organdarmen 288 jobany iske asyrý josparlanǵanyn, onyń ishinde 30 joba – respýblikalyq biýdjet esebinen, 258 joba – jergilikti biýdjet esebinen qarjylandyrylady.
Tasqyn sýdyń yqtimal qaýipin boldyrmaý úshin qurylys jáne basqada inerttik materialdardyń qory daiyndalǵan, sondai-aq tiisti tehnika men tetikter daiyndalǵan.
«2019 jylǵy kóktemgi tasqyn sý kezeńine daiyndalý maqsatynda Basseindik inspektsiialarymen tótenshe jaǵdailar, ekologiia, jergilikti atqarýshy organdardyń jáne «Qazsýshar» RMK filialdary ókilderiniń quramynda GTQ zertteý boiynsha jumys toby quryldy. Osy jumys toby 1136 gidrotehnikalyq qurylystarǵa vizýaldy zertteýdi júrgizdi. Zertteý barysynda 453 GTQ jóndeýdi talap etetindigi anyqtaldy», — dedi I. Ábishev.
Óńirlerde turǵyn úi sektorynda órtterdiń aldyn alý boiynsha qandai sharalar qabyldanyp jatqany týraly jáne aldaǵy sý tasqyny kezeńine daiarlyq týraly Shyǵys Qazaqstan oblysynyń ákimi D. Ahmetov, Aqmola oblysynyń ákimi M. Myrzalin jáne Soltústik Qazaqstan oblysy ákiminiń orynbasary A. Saparov baiandady.
