Qazaqstan úkimeti men Ulttyq bank 14 qyrkúiekte "Tsesnabanktiń" aýylsharýashylyǵy maqsatynda berilgen nesie portfelin "satyp alý ádisteri pysyqtalyp jatqanyn" habarlady. "Tsesnabank" Qazaqstandaǵy aktiviniń kólemi jaǵynan ekinshi iri kommertsiialyq bank sanalady. Satyp alý quny 450 milliard teńge (shamamen 1,2 milliard dollar) bolmaq. Biliktiń málimdeýinshe, nesie portfelin satyp alý banktiń "qarjylyq turaqtylyǵyn nyǵaityp", ony saýyqtyrýǵa múmkindik jasaidy. Úkimet "Tsesnabank" aktsionerleri bankti saýyqtyrýǵa bankke qosymsha óz qarjysynan kapital salý arqyly qatysatynyn aitady.
"Tsesnabank" ótken aptada Ulttyq bankten qysqa merzimge 150 milliard teńge nesie alǵanyn rastaǵan. Nesie "qosymsha ótimdilik qoryn qamtamasyz etý úshin" berilgen. Bank 6 qyrkúiektegi jaǵdai boiynsha nesieniń jartysynan kóbi - 100 milliard teńgeni "óz esebinen ótegenin" habarlaǵan.
14 qyrkúiekte "Tsesnabank" basshylyǵynda ózgerister bolǵanyn habarlady. Banktiń basqarma tóraǵasy Erjan Tóleýbekov qyzmetinen bosap, ornyna buǵan deiin "Kazkommertsbankte" (qazir "Halyq bankpen" qosyldy) jáne Deutsche Bank-te túrli qyzmet atqarǵan Ýlf Vokýrka sailanǵan.
Ótken aida Reuters aqparat agenttigi Fitch reiting agenttiginiń esebine súienip, 2018 jyldyń ekinshi toqsanynda "Tsesnabanktiń" ótimdi aktivteri 30,3 paiyzǵa azaiǵanyn jáne bul Qazaqstandaǵy eń iri 10 bank arasyndaǵy eń úlken quldyraý ekenin habarlaǵan. Reuters Qazaqstan Ulttyq bankine silteme jasap, birneshe memlekettik kompaniia árqily sebeppen "Tsesnabanktegi" depozitterine salǵan aqshasyn qaitaryp alǵanyn jazǵan.
Ulttyq banktiń málimetinshe, "Tsesnabanktiń" aktivi 5,6 milliard dollarǵa jetedi. "Tsesnabank" - Qazaqstan prezidenti ákimshiliginiń burynǵy jetekshisi Ádilbek Jaqsybekov otbasynyń baqylaýynda.
Qazaqstan prezidenti Nursultan Nazarbaev 10 qyrkúiekte Ádilbek Jaqsybekovti "zeinet jasyna jetýine bailanysty" otstavkaǵa jiberý týraly jarlyq shyǵarǵan. Sol kúni Jaqsybekov "Tsesnabank" aktsiialarynyń baqylaý paketine ie "Tsesna" korporatsiiasynyń direktorlar keńesine basshy boldy.
2017 jyly bank sektoryn jaqsartý baǵdarlamasy aiasynda "Tsesnabankke" memleketten jeńildikpen 100 milliard teńge berilgen edi.
Biyl kóktemde prezident Nazarbaev bank sektoryn qoldaý baǵdarlamasy aiaqtalǵanyn málimdep, kommertsiialyq bankterge endi memleketten kómek suramaýdy eskertken.
