Foto: ©Tengrinews.kz
Premer-ministr laýazymyna qaita taǵaiyndalǵan Álihan Smaiylov Úkimet aldaǵy ýaqytta qandai máselelerge basa mán beretinin aitty, dep habarlaidy "Ult aqparat".
Ol Májilistiń jalpy otyrysynda óziniń kandidatýrasyn qoldaǵan depýtattyqtarǵa alǵys aitty.
"Qurmetti Qasym-Jomart Kemeluly! Qurmetti depýtattar! Maǵan artqan senimderińiz úshin shynaiy rizashylyǵymdy bildirgim keledi. Bul - men úshin úlken jaýapkershilik.
Qurmetti Qasym-Jomart Kemeluly, Siz aiqyndap bergen elimizdiń áleýmettik-ekonomikalyq damýy, halyqtyń ómir súrý sapasy men ál-aýqatyn odan ári arttyrý jónindegi mindetter Úkimet jumysynyń negizgi basymdyqtary bolady.
Eń aldymen, biz Memleket basshysynyń Sailaýaldy baǵdarlamasyn jáne Amanat partiiasynyń baǵdarlamasyn iske asyramyz. Sonymen qatar, basqa da partiialar men depýtattardyń, biznes-qaýymdastyqtar men azamattardyń syndarly usynystaryn eskeretin bolamyz. Orta merzimdi kezeńde ekonomikanyń ósimin 5 paiyzǵa deiin jetkizý, biyldyń aiaǵyna deiin infliatsiiany eki ese tómendetý - biz úshin asa mańyzdy mindet.
Kásipkerlikti qoldaý jáne biznes-klimatty jaqsartý jónindegi keshendi sharalar, sondai-aq, biznestiń túitkildi máselelerin sheshý, halyqty jumyspen qamtý jáne azamattarymyzdyń naqty tabysyn ósirý - negizgi baǵyttardyń biri.
Ekonomikany ártaraptandyrýǵa, ishki naryqty otandyq taýarlarmen qamtamasyz etýge jáne qosylǵan quny joǵary shikizattyq emes taýarlar óndirisin ulǵaitýǵa basymdyq beriledi.
El ekonomikasyna, birinshi kezekte, óńdeýshi salalarǵa aýqymdy investitsiialar tartý boiynsha sharalar qabyldanady. Aýyl sharýashylyǵyn damytý jáne azyq-túlik qaýipsizdigin qamtamasyz etý úshin keshendi jumys atqarylady.
Sonymen qatar, energetika salasyn damytý jáne kommýnaldyq infraqurylymdy jańǵyrtý máseleleri óte mańyzdy. Ishki naryqty janar-jaǵarmaimen qamtamasyz etýge erekshe nazar aýdarylady.
"Tarif ornyna - investitsiia" baǵdarlamasyn iske asyrý elektr jáne kommýnaldyq jelilerdiń tozýyn tómendetýge múmkindik beredi.
"Aýyl - El besigi" jobasy aiasynda aýyldyq infraqurylymdy jańǵyrtý keńeitiledi. Kólik jáne logistika salasynda ótkizý qabiletin arttyrýǵa jáne halyqaralyq dálizderdi damytýǵa basymdyq beriledi.
Bilim berý jáne densaýlyq saqtaý salalarynda qyzmetterdiń tiimdiligi men sapasyn jaqsartý, sonymen qatar tsifrlandyrýdy ári qarai jalǵastyrý jáne memlekettik biryńǵai tsifrlyq platformany engizý bizdiń jumysymyzdyń mańyzdy baǵyttary bolady. Úkimettiń aldynda qoiylǵan mindetterdi sheshý úshin tiis sharalar qabyldanady.
Parlament depýtattarymen ózara birlesip, úilesimdi jáne nátijeli jumys jasaimyz dep senim bildiremin", - dedi Premer-ministr.
