Foto: Úkimet
Qazaqstan Úkimeti kóktemgi sý tasqyny saldaryn joiýǵa jáne zaqymdalǵan infraqurylymdyq nysandardy qalpyna keltirýge tótenshe rezervten qosymsha 22,7 mlrd teńge bóldi. Tiisti qaýlyǵa QR Premer-Ministri Oljas Bektenov qol qoidy, dep habarlaidy "" Bul týraly Úkimettiń baspasóz qyzmeti habarlady.
Qarajat Aqmola, Aqtóbe, Qostanai jáne Soltústik Qazaqstan oblystaryndaǵy joldardy, sondai-aq kópirler men sý ótkizgish qurylymdardy qalpyna keltirýge, rekonstrýktsiialaýǵa jáne qurylys jumystary úshin ákimdikterge bólinedi. Atap aitqanda, Aqtóbe oblysynda 31 joba júzege asyrylyp jatyr. Olardyń ishinde Yrǵyz – Nura, Yrǵyz – Quttykól, Qumtoǵai avtojoldaryndaǵy sý ótkizgish qubyrlardy, Oiyl aýylyna aparatyn avtojoldy jóndeý, Oiyl ózenindegi kópirdi qaita jańǵyrtý, sondai-aq Áiteke bi aýdany Áike aýylyndaǵy kópir ótkeli qurylysy bar.
Aqmola oblysynda Atbasar qalasyna aparatyn jol bóligin, Atbasar – Sochinskoe avtojolyn qaita jańartý, Jaltyr – Makinsk avtojolyn, Qalqutan aýylyna, Jambyl jáne basqa da eldi mekenderge kireberis joldaryn jóndeý jumystary júrgiziledi. Barlyǵy – 14 baǵyt.
Qostanai oblysynda qarajat 22 baǵyt boiynsha joldardy, kópirlerdi jáne 10-ǵa jýyq sý ótkizgish qubyrdy jóndeýge jáne rekonstrýktsiialaýǵa jumsalady.
Soltústik Qazaqstan oblysynda 10 joldy, onyń ishinde Kókshetaý – Omby baǵytyndaǵy joldy jóndeý, sondai-aq 22 shaqyrym sý ótkizgish qubyrlarǵa ortasha jóndeý jumystaryn júrgizý josparlanǵan.
Bólingen qarajat jergilikti atqarýshy organdarǵa turǵyndardyń qaýipsiz qozǵalysyn qamtamasyz etý úshin sý tasqynynan keiin búlingen jol bólikterin ýaqytyly qalpyna keltirýge múmkindik beredi.
Aita keteiik, 2024 jylǵy 17 shildede QR Premer-Ministri Oljas Bektenov sý tasqynynan keiin turǵyn úilerdi jáne infraqurylymdy qalpyna keltirý máseleleri boiynsha keńes ótkizdi. Onyń barysynda Úkimet basshysy qalpyna keltirý jumystarynyń qarqynyn arttyryp, týyndaǵan máselelerdi jedel sheshý úshin adamdar men tehnikany jumyldyrýdy tapsyrdy.
