QR Premer-Ministriniń orynbasary - Qarjy ministri Álixan Smaiylov prezidenttik sailaýǵa jumsalatyn qarjynyń naqty somasyn atady, dep habarlaidy Sputnik agenttigi.
Búgin Úkimet kezekten tys prezident sailaýyn ótkizýge úkimet rezervinen 9,4 milliard teńge bólý týraly sheshim qabyldady. Smaiylovtyń aitýynsha, qarajattyń negizgi bóligi respýblika boiynsha qurylatyn 10 myń sailaý ýchaskesiniń jumysyn uiymdastyrýǵa baǵyttalmaq.
"Sailaý ýchaskelerine 70 myńǵa tarta adam tartylady. Bul aqsha, negizinen, sailaý ýchaskelerinde isteitinderdiń jalaqysyna jumsalady", - dedi ol úkimet kýlýarynda.
Buǵan deiin Ortalyq sailaý komissiiasy úkimetten 12 milliard teńge suraǵan bolatyn. Qarjy ministri bul somanyń nege azaitylǵanyn túsindirdi.
"O basta ótinimder óńirlerden keldi. Biz ár aimaq boiynsha sailaý ýchaskeleriniń sany men oǵan tartylatyn adamdardyń sanyn naqtyladyq. Sol kezde keibir adamdardyń sailaý naýqanynyń sońyna deiin istemeitini anyqtaldy. Taǵy da basqa jaǵdailar bar. Sonyń bárin eskerip, naqtylap, 9,4 milliard teńgege túzettik", - dedi Smaiylov.
Aita ketsek, osy jyldyń 9 maýsymynda Qazaqstanda merziminen buryn prezident sailaýy ótedi. Prezidenttikke kandidattardy usyný 28 sáýirge deiin jalǵasady. Úmitkerlerdi elimizde resmi tirkelgen partiialar men respýblikalyq qoǵamdyq birlestikter usynýǵa quqyly.
