QR Úkimeti men Ulttyq banki jaqyn arada ulttyq ekonomikanyń agrarlyq sektoryn qoldaý úshin jańa is-sharalardy iske qosatyn bolady, dep habarlaidy QazAqparat primeminister.kz silteme jasap.
Ekonomikany jańǵyrtýdyń Úshinshi tolqyny men ósimniń jańa modelin qurýdyń qazirgi jaǵdaiynda Agroónerkásiptik keshenniń mańyzy arta túsýde. Bul - strategiialyq sala. Áleýetti lokomativ. Bizdiń maqsatymyz - aldaǵy 5 jyldyń ishinde Agroónerkásiptik keshendegi eńbek ónimdiligi men qaita óńdelgen ónimder eksportyn 2,5 esege ulǵaitý. Bul oraida biz aýyl sharýashylyǵy taýaryn óndirýshiler úshin qarjylandyrý men ónim ótkizý rynoktarynyń qoljetimdi bolýyna jáne eksportty damytýǵa jumys isteýdemiz.
Sonymen birge álemdik rynoktaǵy ahýal qubylmaly, jyldam ózgerýde. Valiýtalyq nesie túrinde júktemesi bar agrarlyq sala syrtqy sebepterdiń aýyrtpalyǵy jaǵdaiynda damýda. Sondyqtan Úkimet pen Ulttyq bank aýyl sharýashylyǵy taýaryn óndirýshilerdi jáne búkil agrarlyq sektordy qoldaýdyń qosymsha is-sharalar paketin daiyndady.
Basty maqsat - salanyń serpindi ósýine qajetti jaǵdai jasaý, jańǵyrtýdyń qarqynyn tómendetpeý, kúrmeýi kúrdeli máselelerdi sheshý.
Is-sharalardyń ishinde AÓK kásiporyndaryna túsetin boryshtyq júktemelerdi azaitýǵa jáne olardyń boryshtyq aýyrtpalyqtaryn azaitýǵa erekshe kóńil bólinip otyr.
Iske asyrý tetikteri - QazAgro holdinginiń talaptaryn qaita qurylymdaý jáne dollarsyzdandyrý, AÓK damytýdyń memlekettik baǵdarlamasynyń jańa quraldaryn paidalaný.
Is-sharalar paketinde qarjylyq institýttardyń, onyń ishinde AÓK damytýdyń baǵdarlamasyn iske asyrý boiynsha seriktes-bankterdiń jumysyna serpin beretin birqatar qarjylyq tetikter bar.
«Tsesnabank» «Agrobiznes 2020» baǵdarlamasy men kásipkerlikti qoldaýǵa arnalǵan memlekettik baǵdarlamalardyń jobalaryn iske asyrýǵa belsendi atsalysyp keledi. Onyń úlesine salany nesielendirýdiń 65% astamy tiesili. Sol sebepten, «Tsesnabank» «QazAgro» holdingimen birlese otyryp, berilgen valiýtalyq nesieler men qaryzdardy qaita qarjylandyrýdy jáne olardyń merzimderin uzartý máselesin qolǵa aldy.
Bul jumystar aiasynda Úkimet pen Ulttyq bank «Tsesnabankten» 450 mlrd teńgege aýyl sharýashylyǵy nesieler portfelin satyp alý tetikterin pysyqtaýda. Bul bankten qaryz alýshy agroónerkásiptik sektor kásiporyndaryn qarjylyq saýyqtyrýdy qamtamasyz etýge múmkindik beredi, sondai-aq «Tsesnabanktiń» qarjylyq turaqtalyǵyn nyǵaitady. «Tsesnabanktiń» aktsionerleri bankti kapitaldandyrý arqyly jeke qarajattary esebinen qaryz alýshylardy saýyqtyrýǵa qatysady.
