Qazaqstan Respýblikasy Premer-Ministriniń orynbasary Roman Skliar men «ArselorMittal TMD» bas direktory Vidjai Goial QR Úkimeti men «ArselorMittal Temirtaý» AQ arasyndaǵy ózara túsinistik týraly memorandýmǵa qol qoidy, dep habarlaidy primeminister.kz.
Memorandým Qazaqstannyń metallýrgiia ónerkásibiniń turaqty damýyn qamtamasyz etedi, sondai-aq áleýmettik, ekologiialyq, eńbek jáne ekonomikalyq salalardaǵy ósýdi kózdeidi.
Memorandým sharttary boiynsha «ArselorMittal Temirtaý» ózin jańǵyrtýǵa investitsiialardy edáýir ulǵaitady, onyń investitsiialyq kelisimshart sheńberindegi jiyntyq kólemi aldaǵy 10 jyl ishinde keminde $3 mlrd quraidy, bul rette osy somanyń kóp bóligi kelisim qoldanylatyn alǵashqy bes jylda investitsiialanatyn bolady.
Qujatqa sáikes «ArselorMittal Temirtaý» AQ qyzmeti halyqtyń densaýlyǵyn jáne áleýmettik turaqtylyǵyn odan ári jaqsartýǵa, sondai-aq ónerkásiptik qaýipsizdikti qamtamasyz etýge, qorshaǵan ortany jáne ekologiiany saqtaýǵa baǵyttalatyn bolady.
Koks himiiasy jáne domna óndirisinde, konverter tsehynda jáne prokat tsehtarynda kúrdeli jóndeý júrgizý, №1 jáne №2 JEO qazandyqtaryn aýystyrý jáne jóndeý, jańa koks batareialaryn salý jáne iske qosý jáne basqa da is-sharalardy júrgizý josparlanýda.
Sondai-aq, «ArselorMittal Temirtaý» AQ táýelsiz sarapshylardy tarta otyryp, óziniń barlyq óndiristik tsiklin qaýipsiz, ekologiialyq, áleýmettik turaqtylyq máninde aýqymdy taldaý júrgizýdi uiymdastyrady, sonyń negizinde taraptar atalǵan salalardy odan ári damytý jónindegi baǵdarlamalardy kelisedi.
Memorandým jasasý aldynda eki tarap ókilderiniń kezdesýi bolyp ótti, onda ózekti máseleler boiynsha ózara is-qimyl algoritmi talqylandy, sondai-aq óndiristi jańǵyrtý jónindegi Jol kartasyna qol qoiyldy.
Jalpy memorandýmǵa qol qoiý taraptarǵa ózara is-qimyldy sapaly jańa deńgeige shyǵarýǵa, «ArselorMittal Temirtaý» AQ óndiristik protsesteriniń qaýipsizdigin jaqsartýǵa, ekologiialyq qaýipsizdik talaptarynyń qaǵidattaryn saqtaýǵa múmkindik beredi.
