Foto: Úkimet
Qazaqstan Respýblikasynyń Premer-ministriniń orynbasary – mádeniet jáne aqparat ministri Aida Balaevanyń tóraǵalyǵymen bilim berý júiesi úshin kadrlar daiarlaý máselesine arnalǵan keńes ótti, dep habarlaidy Ult.kz.
Keńes jumysyna ǵylym jáne joǵary bilim ministri Saiasat Nurbek, oqý-aǵartý ministri Juldyz Súleimenova, Eńbek jáne halyqty áleýmettik qorǵaý ministriniń mindetin atqarýshy Asqarbek Ertaev, sondai-aq bolashaq pedagogterdi daiarlaýǵa mamandanǵan joǵary oqý oryndarynyń basshylary qatysty.
Kezdesýdiń negizgi taqyryby pedagogikalyq bilim berý sapasy jáne oǵan tikelei bailanysty mektepke deiingi jáne mekteptegi oqytýdaǵy ózekti máseleler boldy. Vitse-premerge Pedagogikalyq bilim berýdi damytý tujyrymdamasyn iske asyrýdyń negizgi baǵyttary men nátijeleri baiandaldy. Sonymen birge EYDU júrgizetin Halyqaralyq oqytý men oqý zertteýiniń (TALIS) aiasynda daiyndalǵan analitikalyq qorytyndylar tanystyryldy. Zertteý keiingi úsh jyldaǵy pedagogterdi daiarlaý júiesin jańǵyrtý barysyndaǵy oń ózgeristerdi de, onyń álsiz tustaryn da kórsetti. Atap aitqanda, joǵary oqý oryndaryndaǵy muǵalimder men tárbieshilerdi sapasyz daiarlaý faktileri men mektep túlekteriniń jetkiliksiz daiyndyq deńgeii ózara bailanysty máseleler retinde atap ótildi.
Sonymen birge keńes barysynda fýnktsionaldyq saýattylyqty arttyrý, muǵalimderdiń syni oilaý men tsifrlyq daǵdylaryn damytý ádistemelerinen bastap, jasandy intellektti oqý úderisine engizýdiń naqty tetikterine deiingi birqatar máseleler talqylandy.
Buǵan qosa, búgingi tańda Qazaqstanda bakalavriat deńgeiinde pedagog daiarlaý litsenziiasy bar 52 joǵary oqý orny jumys istep jatqanyna qaramastan, kadr tapshylyǵynyń saqtalyp otyrǵany erekshe atap ótildi.
Qordalanǵan máselelerdi eńserý jóninde salalyq vedomstvolar basshylarynyń kózqarastarymen qatar, pedagogikalyq joǵary oqý oryndarynyń basshylarynyń pikirleri de tyńdaldy.
Óz kezeginde vitse-premer Aida Balaeva qalyptasqan jaǵdaidyń sebepterine nazar aýdardy. Atap aitqanda, ministrlik – ákimdik – joǵary oqý orny arasyndaǵy tiimdi vedomstvoaralyq ózara is-qimyldyń joqtyǵyn atady. Onyń aitýynsha, tek ózara úilesimdi jáne júieli jumys qana mektepterdi qajetti mamandarmen qamtamasyz etýge jáne óńirlerdegi kadr tapshylyǵyn aldyn ala, tiimdi túrde sheshýge múmkindik beredi. Al bul tapshylyqtyń negizgi faktory – eńbek naryǵyna jasalatyn jan-jaqty taldaýdyń bolmaýy.
«Kadr tapshylyǵyna bailanysty óńirler boiynsha qabyldaý saiasatyn qaita qaraý qajet. Kei jerlerde fakýltetterge qabyldaý kólemin arttyrý kerek. Eger bizge pán muǵalimderi, mysaly, matematikter jetispese – tiisti granttar bólý qajet. Joǵary oqý oryndary eńbek naryǵyna beiimdelýi tiis. Jaqyn ýaqytta salada aitarlyqtai ózgerister oryn alýy múmkin. Aitalyq, jasandy intellekttiń damýyna bailanysty birqatar mamandyq ózektiligin joǵaltady. Osyny eskere otyryp, joǵary oqý oryndary men kolledjder naryqtyń naqty qajettilikterine sai jumys isteýi tiis», — dedi Aida Balaeva.
Sondai-aq ol pedagogterdi daiarlaý sapasyna tikelei áser etetin praktikaǵa baǵdarlanǵan oqytýdyń da mańyzyn atap ótti.
«Tájiribesiz teoriianyń paidasy joq. Mamannyń bilimi tek ony is júzinde qoldanǵanda ǵana nátijeli bolady. Barlyq joǵary oqý oryndarynyń stýdentterdiń praktikalyq daiyndyǵyn uiymdastyrýda teń múmkindigi bolýy tiis. Alaida bul naqty ári muqiiat josparlaýdy talap etedi. Búginde biz bolashaq muǵalimderdi daiyndaǵanymyzben, jas mamandar diplom alǵan soń salada qalmaidy. Bul óz kezeginde kadr tapshylyǵyn arttyra beredi. Bul máseleni sheshý úshin kúsh biriktirýimiz kerek. Qazir vedomstvolar arasyndaǵy ózara is-qimyl burynǵydan da mańyzdy. Ortaq maqsat pen mindetterimiz bar ekenin umytpaýymyz qajet», — dedi vitse-premer.
Sóz sońynda QR Premer-ministriniń orynbasary birqatar naqty mindetter men hattamalyq tapsyrmalardy atap ótip, olardyń múmkindiginshe qysqa merzimde oryndalýynyń mańyzdylyǵyn basa aitty.
Birinshiden, salalyq ministrlikter joǵary oqý oryndarymen birlese otyryp, Pedagogikalyq bilimdi damytý tujyrymdamasyn tolyqtyryp, jasandy intellekt tehnologiialarynyń qoǵamdyq ómirge belsendi enip jatqanyn eskerýi qajet.
Ekinshiden, pedagogterdi daiarlaý protsesin praktikalyq baǵytta kúsheitip, stýdentterdiń óndiristik tájiribesin respýblika kóleminde bir júiege keltirip engizý boiynsha jumys josparyn ázirleý kerek.
Úshinshiden, memlekettik bilim granttaryn qaita bólý máselesin qarastyryp, ony mindetti túrde óńirlik qajettilikter men túlekterdiń eńbekke ornalasý nátijelerine sáikestendirý qajet.
Tórtinshiden, mektepke arnalǵan oqýlyqtardy daiarlaý júiesin qaita taldap, oǵan jetekshi pedagogikalyq ýniversitetterdiń mindetti túrde qatysýy qamtamasyz etilýi tiis.
Sonymen qatar vitse-premer joǵary oqý oryndaryn memlekettik ideologiialyq jumysty ilgeriletýde belsendi bolýǵa shaqyryp, onyń bolashaq pedagogterdi, ásirese balabaqsha júiesindegi mamandardy daiarlaýdaǵy erekshe mańyzdylyǵyn atap ótti. Osy oraida, Ǵylym jáne joǵary bilim ministrligine elimizdiń barlyq JOO-larynda Memleket basshysy bekitken ishki saiasatty júzege asyrýdyń jańa qaǵidalaryn tárbielik júiege engizý jumystaryn uiymdastyrý tapsyryldy.
