QR Premer-Ministri Asqar Maminniń tóraǵalyǵymen ótken QR Úkimetiniń otyrysynda QR bilim jáne ǵylym ministri A. Aimaǵambetov tanystyrǵan «Pedagog mártebesi týraly» zań jobasy maquldandy.
«Pedagog mártebesi týraly» zań jobasy QR Tuńǵysh Prezidenti – Elbasy N. Á. Nazarbaevtyń bastamasy boiynsha ázirlengen.
Sondai-aq, ol Memleket basshysy Q. K. Toqaevtyń orta bilim berý júiesin damytý jáne bilim sapasyn arttyrý jónindegi alǵa qoiǵan mindetterine jaýap beredi.
Zań jobasyn ázirleýdiń negizgi ideiasy — muǵalimderdiń júktemesin azaitý, olardy ózderine tán emes jumystardy oryndaýdan bosatý arqyly ózin-ózi damytýǵa jáne shyǵarmashylyqqa múmkindik berý.
Buǵan qosa, muǵalimderdiń jalaqysyn arttyrýǵa, eńbek demalysyn ulǵaitýǵa, pedagogtik sheberlik, tálimgerlik úshin qosymsha aqy tóleýge baǵyttalǵan sharalar kózdelýde. Aita ketý kerek, bul zań jobasy óńirlerdiń ákimderine biýdjet múmkindigine qarai muǵalimderge materialdyq kómek kórsetý máselesin ózdiginen sheshýge múmkindik beredi.
Muǵalimderdiń kásibi turǵydan damýyna jáne básekege qabilettiligin arttyrýǵa jaǵdai jasaý josparlanǵan. Pedagog mártebesin arttyrý, olardy yntalandyrý mindeti de kózdeledi», — dedi Asqar Mamin.
QR Úkimeti basshysynyń aitýynsha, jalpy zań jobasyn iske asyrý muǵalim mamandyǵynyń mártebesin arttyrýǵa, olardyń ar-namysy men qadir-qasietin qorǵaýǵa, pedagogtar úshin áleýmettik kepildikter júiesin jasaýǵa jol ashady.
Máseleni qaraý qorytyndysy boiynsha, QR Premer-Ministri Asqar Mamin osy jyldyń 1 qyrkúiegine qarai Parlament Májilisine «Pedagog mártebesi týraly» jáne «Pedagog mártebesi, oqýshy men muǵalim júktemesin tómendetý máseleleri jónindegi keibir zańnamalyq aktilerge ózgerister men tolyqtyrýlar engizý týraly» zań jobalaryn engizýdi qamtamasyz etýdi tapsyrdy.
Jiynda Almaty oblysynyń ákimi A. Batalov pen Nur-Sultan q. ákimi A. Kólginov zań jobasynyń erejelerin pedagogikalyq qoǵamdastyq ókilderimen talqylaý týraly baiandady. Sondai-aq, Úkimet otyrysynda josparlanǵan jańalyqtardy talqylaýǵa shaqyrylǵan Aqmola oblysy Nikolsk orta mektebiniń pedagogy N. Quttybaeva sóz sóiledi.
