Premer-Ministrdiń orynbasary Eraly Toǵjanov Úkimettiń koronavirýsqa qatysty jaǵdaidy baqylaýynda ustap, tiisti sharalardy qabyldap jatqanyn aitty, dep habarlaidy "Ult aqparat".
«Memleket basshysy Qasym-Jomart Toqaevtyń Qytaida tirkelgen koronavirýstyń Qazaqstan aýmaǵynda taralmaýyna jol bermeý jóninde Úkimetke naqty uiymdastyrý sharalaryn qabyldaýdy tapsyrǵan edi. Bul máseleni Prezident jeke baqylaýynda ustap otyr. Úkimet otyrysynda Premer-Ministrdiń qatysýymen kún saiyn qaralýda. Arnaiy is-josparlary búgin de bekitilgen. Atalǵan máseleni jiti qadaǵalaýda ustaý maqsatynda qurylǵan úkimettik vedomstvoaralyq komissiianyń turaqty jumysy atqarylyp, kúndelikti qajetti sharalar boiynsha naqty sheshimder iske asyrylýda», - dedi Eraly Toǵjanov Úkimettiń baspasóz ortalyǵynda ótken brifing barysynda.
Úkimet basshysynyń orynbasary atap ótkendei óńir basshylaryna da tiisti tapsyrmalar berilip jatqanyn jetkizdi.
«Máseleniń mańyzdy ekeni aidan anyq. Nege deseńiz ár azamattyń ómiriniń qaýipsizdigin qamtamamyz etý – bárimizdiń negizgi mindetterimizdiń biri. Virýstyń taralý aimaǵy qysqa merzimniń ishinde tez ósýde. Búgingi tańdaǵy málimetke sáikes koronavirýs 88,4 myńdai adamǵa juqqan. 3 myńǵa jýyq adam qaitys bolǵan. 42,8 myńnan astam adam jazylyp ketken», - dedi ol.
