QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda kóktemgi egis jumystaryn júrgizýge daiyndyq barysy qaraldy, dep habarlaidy "Ult aqparat" primeminister.kz saityna silteme jasap.
Sharýalardyń egis naýqanyna daiyndyǵy týraly aýyl sharýashylyǵy ministri S. Omarov, janar-jaǵarmai materialdarymen qamtamasyz etý týraly energetika ministri N. Noǵaev, óńirlerdegi jaǵdai týraly Túrkistan oblysynyń ákimi Ó. Shókeev, Almaty oblysynyń ákimi A. Batalov, Qostanai oblysynyń ákimi A. Muhambetov baiandady.
Biyl 22,5 mln ga jerdi igerý josparlanyp otyr, bul 2019 jylǵy deńgeiden 238 myń ga artyq. Dándi daqyldar shamamen 15,2 mln ga (onyń ishinde bidai – 11,4 mln ga), maily daqyldar 3 mln ga (+122 myń ga), maqta 110 myń ga, qant qyzylshasy 22 myń ga, kókónis-baqsha daqyldary jáne kartop 471,7 myń ga, jemshóp daqyldary 3,7 mln ga jerge egiledi dep kózdelgen.
Kóktemgi egis jumystaryn júrgizý úshin qajetti dizel otynynyń kólemi anyqtaldy – 387 myń tonna (aýyl sharýashylyǵy taýaryn óndirýshiler úshin ortasha baǵa – shamamen 177 teńge/litr). Respýblikada 143 myń traktor, 78 myń tuqym sepkish, 243 myń topyraq óńdeý quraldary, 4 myń egis keshenderi bar. 2020 jylǵy 15 naýryzdaǵy jaǵdai boiynsha traktorlardyń ázirligi 94%-dy, tuqym sepkishter 93%-dy, egis keshenderi 100%-dy, topyraq óńdeý quraldarynyń daiyndyǵy 95%-dy quraidy.
Agroónerkásiptik keshen sýbektilerin qoldaý úshin «Agrarlyq nesie korporatsiiasy» AQ respýblikalyq biýdjetten 70 mlrd teńge kóleminde biýdjettik nesie bóldi, bul ádettegi tájiribeden 10 mlrd-qa artyq. Sońǵy qaryz alýshylar úshin syiaqy mólsherlemesi jyldyq 5%-dan aspaidy. Bólingen qarajat 3 mln ga egis alqabyn qamtýmen AÓK 2400 sýbektisin qarjylandyrýǵa múmkindik beredi.
«Jalpy kóktemgi egis jumystaryna daiyndyq ýaqytyly júrgizilip jatyr. Úkimet tarapynan kóktemgi egistikti qarjylyq jáne materialdyq-tehnikalyq qamtamasyz etý boiynsha barlyq qajetti sheshimder qabyldandy», — dedi A. Mamin.
Úkimet basshysy keibir óńirlerdiń tuqym daiyndaý (ShQO, BQO, Qyzylorda, Pavlodar, Aqtóbe oblystary), aýyl sharýashylyǵy tehnikasyn daiyndaý josparlarynan (BQO, Aqmola, Almaty, Qyzylorda oblystary) artta qalyp jatqanyn, sondai-aq barlyq derlik oblystarda (Jambyl jáne Túrkistan oblystarynan basqa) tyńaitqyshtar boiynsha sýbsidiialardyń bekitilgen normalarynyń joqtyǵyn atap ótti.
«Aýyl sharýashylyǵy ministrligi men oblys ákimderi kóktemgi egis jumystaryn sapaly júrgizý boiynsha barlyq qajetti sharalardy ýaqytyly qabyldasyn. Energetika ministrligi bekitilgen keste men baǵaǵa sáikes qajetti dizel otynyn jetkizýdi qamtamasyz etsin», — dep tapsyrma berdi A. Mamin.
Premer-Ministr «QazAgro» UBH» AQ-ǵa qarjy qarajatyn tiimdi paidalanýdy jáne olardyń aýyl halqy úshin qoljetimdiligin qamtamasyz etýdi tapsyrdy.
