Úkimet basshysynyń orynbasary Eraly Toǵjanov koronavirýstyń elge kirip, taralýyna jol bermeý memlekettiń ǵana emes, árbir otbasynyń jaýapkershiligi ekenin málim etti, dep habarlaidy "Ult aqparat".
«Bul memlekettiń ǵana jaýapkershili emes, ár otbasynyń, ár memlekettik organnyń, jergilikti jerdegi uiymdardyń da ortaq jaýapkershiligi. Sondyqtan ony tolyqtai sezinýimiz kerek. Keiingi kezde keibir BAQ nemese áleýmettik jeliler arqyly shyndyqqa múlde sáikes kelmeitin aqparattardy baiqap otyrmyz. Syrttan kelgen aqparattarǵa senbeýlerińizdi barlyq azamattan suraimyz», - dedi Eraly Toǵjanov Úkimettiń baspasóz ortalyǵynda ótken brifing barysynda.
Úkimet basshysynyń orynbasary jalǵan aqparat taratqan adamdardyń zańǵa sáikes jaýapkershilikke tartylatynyn eske saldy.
Eske sala ketsek buǵan deiin Eraly Toǵjanov Úkimet koronavirýsqa qatysty jaǵdaidy baqylaýda ustap, tiisti sharalardy qabyldap jatqanyn aityp bergen edi.
Koronavirýsqa qatysty jalǵan aqparattardyń biri ótken demalys kúnderi Jambyl oblysynda taraǵan bolatyn.
