Qazaqstan halyq partiiasynyń kóshbasshysy Aiqyn Qońyrov májilis otyrysynda QHP fraktsiiasy memleket basshysynyń premer-ministr Asqar Mamindi qaitadan úkimet basshysy etip taǵaiyndaý týraly usynysyn qoldamaitynyn aitty, dep habarlaidy Sputnik Qazaqstan.
Ol partiia músheleriniń qazaqstandyqtarmen kezdesý kezinde prezidenttiń tapsyrmalary baiaý oryndalatyny týraly halyqtyń narazylyq bildirgenin jetkizdi.
"Bizdiń halqymyz óte shydamdy jáne meiirimdi. Halyqqa siz sekildi ashyq aitar bolsa, olar bárin túsinedi, alaida úkimet muny túsingen joq. Úkimet halyqqa senim uialatatyn júie qura almady. Pandemiia jáne shikizat baǵasynyń quldyraýy halyq tabysynyń tómendeýine ákeldi. Azamattar óz tabystarynyń 50%-ten astamyn tek azyq-túlikke jumsady, sebebi Qazaqstanda azyq-túliktiń baǵasy EAEO-da eń qymbat bolyp otyr. Al úkimet statistikany túzep qana otyr", – dedi Qońyrov.
Aitýynsha, bul halyqqa unamaidy, sebebi ol sandar adamdy toidyrmaidy, nesieni tólep bermeidi.
Sonymen qatar Qońyrov el prezidentine Qazaqstan halyq partiiasynyń májilis jáne málihat depýtattary úkimet pen ákimderdiń qarapaiym halyq máselesin sheshýden qashpaýy úshin bárin isteitinin aitty.
"Prezident myrza, búgin Qazaqstannyń halyq partiiasynyń fraktsiiasy, ókinishke orai, sizdiń premer-ministr Asqar Uzaqbaiuly Mamindi, onyń ministrler kabinetiniń múshelerin qyzmetinde saqtaý týraly usynysyńyzdy qoldai almaidy jáne daýys berý kezinde qalys qalady", – dedi Aiqyn Qońyrov.
Aita keteiik, prezident májilistiń jalpy otyrysyna qatysty. Otyrysta memleket basshysy premer-ministr laýazymyna Asqar Maminniń kandidatýrasyn usyndy. Depýtattardyń daýys berýi nátijesinde Asqar Mamin premer-ministr bolyp sailandy. Maminge otyrysqa qatysqan 99 depýtattyń 78-i qoldap daýys berdi, 21 adam qalys qaldy.
