Qazaqstan Úkimeti keler jyldan bastap mindetti áleýmettik meditsinalyq saqtandyrý júiesi men kepildendirilgen tegin meditsinalyq kómek sheńberinde kórsetiletin qyzmetter tizimin bekitti.
«Atalǵan eki pakettiń aiyrmashylyǵy qandai? Kepildendirilgen tegin meditsinalyq kómek paketi minimaldy standarttardan turady. Mysaly: shuǵyl kómekke zárý azamattarǵa meditsinalyq kómek kórsetý, epidemiianyń jappai taralýyna jol bermeý, memlekettiń aralasýyn qajet etetin qiyn jaǵdailarǵa dýshar bolǵan naýqastarǵa kómek kórsetý t.b. Saqtandyrý paketi patsientterdiń ómir sapasyn jaqsartyp, ult bolashaǵynyń negizin qalaýǵa baǵyttalatyn ózge de kómek túrlerin qamtidy», - delingen «Áleýmettik meditsinalyq saqtandyrý qory» KEAQ baspasóz qyzmeti taratqan málimette.
Habarlamaǵa súiensek, kepildendirilgen tegin meditsinalyq kómek paketiniń jańa nusqasyn ázirlegen kezde tizimge engen barlyq qyzmet túrleri jan-jaqty saraptalyp, ekshelgen. Paketterdiń jańa úlgisin daiyndaý barysynda ministrlik bir jarym jyl boiy meditsina salasy ókilderimen birlesip jumys istedi. Atap aitqanda, qyzmetterdi satyp alý, aqy tóleý, monitoring protsesin júzege asyrý tetikteri keńinen talqylandy.
«Bul baǵyttaǵy jumystar aldaǵy ýaqytta da jalǵasyn tabady. Degenmen MÁMS júiesin engizýge daiyndyǵymyz joǵary deýge bolady. Jańa paketter biyl kúzde elimizdegi aimaqtardyń birinde nobaily rejimde iske qosylmaq. Jańa júie 2020 jyldan bastap Qazaqstannyń barlyq aimaqtarynda iske qosylady», dep atap ótedi baspasóz qyzmeti.
«Jalpy alǵanda, keler jylǵa arnalǵan biýdjet jobasynda kepildendirilgen tegin meditsinalyq kómek pen saqtandyrý paketteri negizinde kórsetiletin kómekke 1 620 mlrd teńgeden astam qarjy qarastyrylǵan», - dedi «Áleýmettik meditsinalyq saqtandyrý qory» KEAQ basqarma tóraǵasy Aibatyr Jumaǵulov.
Elimizdiń barlyq azamattary paidalana alatyn kepildendirilgen tegin meditsinalyq kómek paketine jedel járdem men sanitarlyq aviatsiia, shuǵyl statsionarlyq kómek, palliativtik kómek engen. Sonymen qatar, áleýmettik mańyzy bar syrqattar men sozylmaly aýrýlardyń negizgi túrlerimen aýyratyn turǵyndar osy paket sheńberinde konsýltativtik-diagnostikalyq kómekpen, josparly statsionarlyq jáne statsionardy almastyratyn kómekpen qamtamasyz etiledi. Ambýlatoriia deńgeiinde dári-dármekpen qamtý, týberkýlezge shaldyqqandardy ońaltý qyzmeti de osy paketke kiredi.
Mindetti áleýmettik meditsinalyq saqtandyrý paketi: konsýltativtik-diagnostikalyq kómek, sonyń ishinde baǵasy qymbat bolyp keletin zerthanalyq qyzmet túrlerin, tegin kepildendirilgen meditsinalyq kómekke enbegen syrqattardy dári-dármekpen qamtamasyz etý, tegin kepildendirilgen meditsinalyq kómek paketine jatpaityn jaǵdailarda josparly statsionarlyq jáne statsinardy almastyratyn kómekpen qamtý, meditsinalyq ońaltý jáne patsient densaýlyǵyn qalpyna keltirýge baǵyttalǵan em-dom túrlerin qamtymaq.
Esterińizge sala ketsek, TMKKK sheńberinde halyqqa kórsetiletin meditsinalyq qyzmetterdi biýdjet qarjysy esebinen, MÁMS paketine enetin qyzmetter - Qordyń aktivteri esebinen satyp alynady. Qazirgi tańda Meditsinalyq saqtandyrý qoryna Qazaqstan boiynsha 176,7 mlrd teńge kóleminde jarna aýdaryldy. Jinaqtalǵan qarjy Ulttyq bankte saqtalady jáne 2020 jyldan bastap MÁMS sheńberinde kórsetilgen qyzmetter aqysyn tóleýge jumsalady.
