Búgin QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn júzege asyrý boiynsha jalpyulttyq is-sharalar josparynyń jobasy qaraldy. Bul týraly QR Premer-Ministriniń baspasóz qyzmeti habarlady.
QR Ulttyq ekonomika ministri T. Súleimenovtyń aitýynsha, jalpyulttyq josparda elimizdiń damýy úshin qolǵa alynatyn negizgi alty mindet boiynsha 100 is-shara qamtylǵan.
Memleket basshysy Joldaýdaǵy birinshi tapsyrma — «Halyq tabysynyń ósýi» mindeti boiynsha qazaqstandyqtardyń ál-aýqatynyń ósýine erekshe nazar aýdardy. Bul maqsatqa jetý úshin qazaqstandyqtardyń tabysyn arttyryp, ómir súrý sapasyn jaqsartýǵa baǵyttalǵan 24 is-shara qarastyrylyp otyr.
«Qazaqstandyqtar úshin asa mańyzdy sharalardyń biri – 2019 jylǵy 1 qańtardan bastap eń tómengi jalaqy mólsherin birtindep 1,5 ese artyrý sharasy. Halyqtyń kirisin qorǵaý úshin zańnamaǵa tarif belgileý tetiginiń, kommýnaldyq qyzmetterdi tutynýshylardyń qarajatyn paidalanýdyń ashyqtyǵyn qamtamasyz etý úshin ózgerister engiziletin bolady. Biznesti tiimdi qoldaý maqsatynda 2025 jylǵa deiingi Biznestiń jol kartasy baǵdarlamasy jalǵastyrylady», — dedi T. Súleimenov.
«Turmys sapasyn arttyrý» ekinshi mindettiń aiasynda eki mańyzdy sala — bilim berý jáne densaýlyq saqtaýdy qamtityn 24 is-shara kózdelgen. Ulttyq ekonomika ministriniń málimdeýinshe, oqýshylar ornynyń tapshylyǵyn joiý jáne úsh aýysymdy mektepter problemasyn sheshý maqsatynda osy jyldyń sońynda óńirlerde mektepterdiń qurylysy bastalatyn bolady.
Densaýlyq saqtaý salasynda meditsina qyzmetteriniń sapasyn arttyrý úshin 2019 jylǵy 1 qańtardan bastap barlyq emhanalar men aýrýhanalar meditsinalyq qujattamany qaǵazsyz, tsifrlyq túrde júrgizýge kóshedi.
«Biyl Astanada Ulttyq ǵylymi onkologiialyq ortalyqtyń qurylysy bastalady. Ol qazirgi zaman talabyna jaýap beretin qurylǵylarmen jabdyqtalady. Halyqty sapasyz jáne densaýlyqqa qaýipti taýarlar men qyzmetterden qorǵaý maqsatynda Taýarlar men qyzmetter sapasyn jáne qaýipsizdigin baqylaý komiteti qurylady», — dedi T. Súleimenov.
Ulttyq ekonomika ministri Jalpyulttyq jospardyń barlyq sharalary turǵyn úi jaǵdailaryn jaqsartýǵa, elimizdiń kez kelgen eldi mekeninde jaily ári qaýipsiz ómir súrýge jaǵdai jasaýǵa baǵyttalǵanyn atap ótti.
Buǵan qosa, elimizdi tiimdi aýmaqtyq uiymdastyrý maqsatynda Elimizdi aýmaqtyq-keńistiktik damytýdyń 2030 jylǵa deiingi boljamdy shemasy qabyldanatyn bolady, bul Elimizdiń basqarylatyn kenttenýiniń jańa kartasyna ainalady. Ministrdiń aitýynsha, Óńirlerdi damytýdyń 2025 jylǵa deiingi baǵdarlamasy naqty is-sharalaryn, jobalary men qarjylandyrý kólemin kórsete otyryp kelesi jyly qabyldanatyn bolady. Kólik infraqurylymyn, kommýnaldyq jáne turǵyn úi qurylysyn damytý maqsatynda «Nurly jol», «Nurly jer» memlekettik baǵdarlamalary uzartylatyn bolady.
Sondai-aq, T. Súleimenovtyń aitýynsha, quqyq qorǵaý organdarynyń jumysyn túbegeili jaqsartý jáne azamattar qaýipsizdigin qamtamasyz etý maqsatynda halyqpen jumys isteýdiń jańa zamanaýi formatyn engizýdi, qoǵamdyq qaýipsizdikti monitoringileý júielerimen qamtamasyz etýdi kózdeitin ishki ister organdaryn jańǵyrtý boiynsha Jol kartasy qabyldanatyn bolady.
«Sottardyń jumys isteýiniń zamanaýi formatyn jáne ozyq elektrondyq servisterdi engizý, artyq sot rásimderin qysqartý arqyly sot júiesi odan ári jańǵyrtylatyn bolady», — dedi ol.
«Azamattar suranysyna beiimdelgen memlekettik apparat» atty tórtinshi mindet aiasynda 19 is-shara kózdelgen. Memleket pen qoǵam arasyndaǵy alshaqtyqty qysqartý maqsatynda memlekettik saiasattyń naqty sharalary men nátijelerin adamdarǵa túsindirýdi kózdeitin «Jańa formatsiianyń basshysy» baǵdarlamasy ázirlenetin bolady.
«Tiimdi syrtqy saiasat» besinshi mindeti aiasynda syrtqy saiasatty qazirgi jaǵdailarǵa beiimdeý jáne ulttyq múddeni pragmatizm qaǵidattarynda ilgeriletý boiynsha sharalar qabyldanatyn bolady.
«Árbir qazaqstandyqtyń elimizdegi ózgerister úderisterine atsalysýy» altynshy mindettiń sheńberinde 6 is-shara kózdelgen.
T. Súleimenovtyń aitýynsha, «Rýhani jańǵyrý» baǵdarlamasyna jańa mazmun men baǵyttardy qarastyratyn ózgerister men tolyqtyrýlar engiziledi. Memleket basshysy jariialaǵan Jastar jyly aiasynda jastardyń barlyq sanatyn qoldaý sharalaryn kózdeitin is-sharalar jospary qabyldanatyn bolady. Áskeri-patriottyq tárbieniń rólin kúsheitý úshin mektepterde «Sarbaz» balalar-jasóspirimder birlestigi qurylady.
«Jalpy alǵanda Jalpyulttyq jospardy ýaqytyly oryndaý Memleket basshysynyń halyqtyń ál-aýqatyn jaqsartýǵa baǵyttalǵan Joldaýda bergen tapsyrmalaryn tiimdi iske asyrýdy qamtamasyz etýge múmkindik beredi jáne elimizdegi áleýmettik-ekonomikalyq turaqtylyqty qamtamasyz etýge negiz bolady», — dep túiindedi ulttyq ekonomika ministri.
