«Atameken» ulttyq kásipkerler palatasynyń kezekten tys IH sezinde QR Premer-Ministri Álihan Smaiylov otandyq biznesti damytýǵa qatysty oiyn ortaǵa saldy, dep habarlaidy QazAqparat.
«Búgin - búkil biznes-qoǵamdastyq úshin mańyzdy kún. Sizder palatanyń jańa tóralqa músheleri men tóraǵasyn sailadyńyzdar. Osy rette, Abylai Isabekulyna elimizdegi kásipkerlikti damytýǵa qosqan kóp jylǵy jumysy úshin alǵys aitamyz. Tóralqanyń jańa músheleri men tóraǵasy Raiymbek Batalovqa tabys tileimiz. Raiymbek Ánýaruly biznes salasynda tájiribeli azamat. Biznes-qoǵamdastyqtyń talap-tilegin jaqsy biledi. Úkimet biznestiń problemalaryn biledi jáne olardy sheshý máselesin erekshe nazarynda ustaidy», - dedi Álihan Smaiylov.
Úkimet basshysynyń aitýynsha, qazir kásipkerlik salasyndaǵy ózekti problemalardy sheship, qazaqstandyq biznestiń odan ári órkendeýine jol ashý kerek.
«Ótken jyly birinshi vitse-premer retinde shaǵyn jáne orta biznesti damytý jóninde apta saiyn keńes ótkizdik. Keńeste 18 qyzmet salasy boiynsha biznestiń 160-tan astam máselesin qaradyq. Osy problemalardyń shamamen 75%-i oń sheshimin tapty. Keshe memlekettik organdar men palata ókilderiniń qatysýymen ótken keńeste 250-den astam másele qosymsha aityldy. Búgin olar týraly taǵy da baiandaldy. Úkimet aldaǵy ýaqytta osy máselelermen belsendi ainalysady», - deidi ol.
Sondai-aq, Premer-Ministr bizneske qatysty ár problemanyń muqiiat qaralatynyn aitty.
