QR Premer-Ministri Asqar Mamin «Jas kásipker» jáne «Bastaý biznes» áleýmettik jobalaryn iske asyrý barysymen tanysty, dep habarlaidy "Ult aqparat" primeminister.kz saityna silteme jasap.
QR Premer-Ministri Asqar Mamin áleýmettik jobalardy iske asyrý aiasynda Nur-Sultan qalasyndaǵy «Atameken» qoldaý ortalyǵy» mobildi jumyspen qamtý ortalyǵyna, jumysshy mamandyqtaryna oqytý jónindegi oqý ortalyǵyna jáne «Jas kásipker» jańadan bastaýshy kásipkerlerge arnalǵan oqý ortalyǵyna bardy.
«Atameken» mobildi jumyspen qamtý ortalyǵynyń qyzmeti jastardy kásipkerlik negizderine oqytýǵa jáne odan keiin jumyspen qamtýǵa baǵyttalǵan. Mobildi ortalyqtar Nur-Sultan, Almaty jáne Shymkent qalalarynda ashylǵan, búginde 9 ortalyq jumys isteidi, Qazaqstannyń barlyq óńirlerinde taǵy 30 ortalyq ashý kózdelgen.
QR Premer-Ministri Nur-Sultan qalasyndaǵy «Atameken» qoldaý ortalyǵy» jumyspen qamtý ortalyǵynda jeke isin ashýǵa niet etip júrgen jas mamandarmen kezdesip, áńgimelesti.
Úkimet basshysy QR Tuńǵysh Prezidenti N. Nazarbaevtyń áleýmettik saiasaty aiasynda jáne QR Prezidenti Q. Toqaevtyń tapsyrmasy boiynsha Úkimet halyqtyń ál-aýqatyn arttyrýǵa baǵyttalǵan shuǵyl sharalar paketin ázirlegenin atap ótti. Osy jyldyń sońyna deiin 300 myńnan astam jas azamat jumyspen qamtýǵa kómektesý sharalarymen qamtylady. Sonyń ishinde «Bastaý Biznes», «Jas kásipker» baǵdarlamalary aiasynda qysqa merzimdi kásiptik oqytý, startap jobalarǵa granttar men shaǵyn nesieler berý arqyly qoldaý kórsetiledi.
Sondai-aq, QR Premer-Ministri tigin isine oqytatyn «DANMARD» oqý ortalyǵyna bardy. Atalǵan oqý ortalyǵynda oqý kezeńi – 3 ai, ai saiynǵy shákirtaqy 21 myń teńgeni quraidy.
QR Premer-Ministri kásipkerlik negizderine oqytatyn «Jas kásipker» oqý ortalyǵynda joba qatysýshylary úshin biznes-trening ótkizdi.
Oqý aiaqtalǵannan keiin jumyssyz jáne ózin-ózi jumyspen qamtyǵan jastar 500 myń teńgeden astam óteýsiz grantqa úmitker bola alady, sondai-aq, aiyna 19 myń teńge kóleminde shákirtaqy ala alady.
Búginde Qazaqstan kásiporyndarynyń negizinde 563 oqý ortalyǵy jumys isteidi (elordada 50 oqý ortalyǵy), bolashaqta olardyń sanyn 1000-ǵa deiin ulǵaitý kózdelgen.
