Muqtaj qart adamdardyń barlyǵyna ataýly kómek kórsetiledi. Bul týraly Májiliste «Nur Otan» partiiasynyń sailaý aldyndaǵy mindettemelerin iske asyrýǵa arnalǵan talqylaý kezinde Premer-Ministr Asqar Mamin málim etti, dep habarlaidy "Ult aqparat".
«Aǵa býyn ókilderin qoldaý boiynsha jumys jalǵasady. 2024 jyly zeinetaqylardy resimdeý boiynsha barlyq rásimder proaktivti formatqa kóshý arqyly elektrondyq túrde kórsetiletin bolady. Biyl zeinetaqylar men járdemaqylardy taǵaiyndaý protsesteriniń 92 paiyzy tsifrlanady», - dedi Mamin.
Onyń aitýynsha, muqtaj qart adamdardyń barlyǵyna ataýly kómek kórsetiledi.
«Aǵa býyn ókilderiniń turmys sapasyn jaqsartý, densaýlyǵyn saqtaý jáne nyǵaitý maqsatynda 2025 jylǵa deiin árbir óńirde Belsendi uzaq ómir ortalyqtary qurylady. Qazirgi kezde mundai ortalyqtar Nur-Sultan jáne Almaty qalalarynda jumys isteidi», - dedi Úkimet basshysy.
Onyń sózine qaraǵanda, ortaq zeinetaqylar jyl saiyn infliatsiia deńgeiinen 2 paiyzǵa asyrylyp, indekstelip otyrady.
«Nátijesinde 2025 jyly ortaq zeinetaqy mólsheri 2020 jylǵy deńgeige qaraǵanda 37 paiyzǵa ósedi», - dedi Premer-Ministr.
