QR Úkimet basshysy Baqytjan Saǵyntaev zeinetaqy qarjysyn jeke kompaniialardyń basqarýyna berý merzimin atady. Bul jaiynda Premer-Ministrdiń depýtattyq saýalǵa bergen jaýabynda málim boldy, dep habarlaidy Ult.kz tilshisi QazAqparat agenttigine silteme jasap.
«Atalǵan máseleni egjei-tegjeili pysyqtaý úshin jeke basqarýshy kompaniialardyń basqarýyna zeinetaqy aktivterin berý boiynsha sharalardy oryndaý merzimi 2018 jyldyń sońyna deiin belgilendi», - dep atap ótilgen saýalǵa berilgen jaýapta.
Úkimet basshysy QR Ulttyq banki jeke basqarýshy kompaniialarǵa zeinetaqy aktivterin berý turǵysynda usynysty ázirlegenin eske salyp ótti. 2016 jáne 2017 jyldardyń barysynda bul usynystar Ekonomikalyq saiasat jónindegi keńeste birneshe márte talqylandy, sondai-aq qazirgi ýaqytta Qzaqstannyń qarjy uiymdarynyń qaýymdastyǵy alańynda biznes-qoǵamdastyqpen talqylanýda.
Zeinetaqy aktivterin ishki naryqtaǵy jeke basqarýshy kompaniialardyń basqarýyna berý rásimderin anyqtaýmen qatar, Ulttyq bank zeinetaqy aktivteri bóliginde indekstik investitsiialaý úshin sheteldik basqarýshylardy tartý boiynsha jumystardy júrgizýde.
«Qazirgi ýaqytta jahandyq aktsiialar men obligatsiialardyń mandattary boiynsha sheteldik basqarýshy kompaniialardyń syrtqy basqarýyna zeinetaqy aktivterin berý jumystary júrgizilip jatyr. Ol kompaniialar - Qazaqstannyń Ulttyq qorynyń aktivteri jáne Ulttyq banktiń altyn-valiýta aktivteriniń syrtqy basqarýshylary. Sondai-aq «Jahandyq belsendi aktsiialar» mandaty boiynsha jańa syrtqy basqarýshylardy tańdaý jumystary júrgizilýde», - delingen habarlamada.
Zeinetaqy aktivterin syrtqy basqarýǵa berýdi aǵymdaǵy jyldyń sońyna deiin bastaý josparlanýda.
