Foto: primeminister.kz
Shymkentke jumys saparymen kelgen QR Premer-Ministri Álihan Smaiylov josparlanǵan baǵdarlamadan bólek, birinshi kezekte qalalyq áýejaidyń jai-kúiimen tanysyp, jańa terminal qurylysyn jedeldetýdi tapsyrdy, dep habarlaidy "Ult aqparat" primeminister.kz saityna silteme jasap.
Álihan Smaiylov Shymkent Shyǵys pen Batys arasyndaǵy kólik qozǵalysynyń túiisken jerinde ornalasqan elimizdegi úshinshi iri megapolis ekenin atap ótti. Bul óz kezeginde tikelei jáne tranzittik reisterdi oryndaýǵa yńǵaily jaǵdai jasaidy.
Sonymen qatar Premer-Ministr Shymkent áýejaiynyń jaǵdaiy halyqaralyq mártebege sáikes kelmeitinin atap ótti.
«Jańa terminal salý 2018 jyly tapsyrylǵan bolatyn. Ne sebepten áli kúnge deiin paidalanýǵa berilmei otyr? Qalaǵa nemese elge kelgen týrister men qonaqtar eń aldymen áýejaidyń jaǵdaiyna nazar salady. Sol sebepti tez arada jańa terminaldy paidalanýǵa berý kerek», — dedi Álihan Smaiylov.
Shymkent qalasynyń ákimi Marat Áitenov búgingi tańda joba 80%-dan astamǵa aiaqtalǵanyn, qurylys 40 myń sharshy metr alyp jatqanyn aitty. Terminal 2023 jyldyń sońynda tolyǵymen paidalanýǵa beriledi. Qala basshysynyń aitýynsha, bul respýblikadaǵy eń iri terminaldardyń biri bolmaq.
Úkimet basshysy ákimdikke jumystardyń barlyǵyn múmkindiginshe tezirek aiaqtap, qurylystyń odan ári sozylýyna jol bermeý qajettigin atap ótti.
