Baqytjan Saǵyntaev Memleket basshysynyń tapsyrmasy boiynsha Qaraǵandy oblysyna jumys sapary aiasynda Sátbaev qalasyna baryp, onda «Nurly meken» jańa shaǵyn aýdanynyń qurylys jumystarymen tanysty, dep habarlaidy "Ult aqparat" QR Úkimetiniń baspasóz qyzmetine silteme jasap.
«Nurly meken» shaǵyn aýdanyna Jezqazǵan qalasynyń apatty úileriniń turǵyndary jáne mys ken oryndaryn qaita óńdeý kezinde qulaǵan aýdan aimaǵyndaǵy kórshi eldi mekenniń turǵyndary kóshiriledi. Olar Jezqazǵan, Sátbaev jáne Ulytaý óńirlerin áleýmettik-ekonomikalyq damytýdyń 2012-2020 jyldarǵa arnalǵan keshendi jospary aiasynda jańa páterlerge ie bolady.
Qonys aýdarýshy azamattar úshin búgingi tańda shaǵyn aýdanda 1760 páter (118 700 m ²) salyndy. Magistraldi jylý júiesi júrgizilgen, úiler qajetti injenerlik kommýnikatsiialarmen qamtamasyz etilgen.
Sátbaev qalasynyń ákimi A. Ydyrysov 2018 jyldyń maýsym aiynyń sońyna deiin aýdany 12 100 m² (195 páter) bolatyn 4 úi turǵyzylatynyn aitty. Buǵan qosa, biyl 107 eki páterli úi men eki jataqhana qurylysyn aiaqtaý kózdelgen.
Baqytjan Saǵyntaev, sondai-aq, nysandy aralaý barysynda Jezqazǵan óńiriniń turǵyn úi qurylysy josparlarymen jáne Memleket basshysynyń «Bes áleýmettik bastama» úndeýinde bergen tapsyrmalaryn eskere otyryp, «Nurly jer» baǵdarlamasyn iske asyrý josparymen tanysty.
«Nurly jer» turǵyn úi qurylysy baǵdarlamasy boiynsha ótken jyly Qaraǵandy oblysynda 374 100 m² turǵyn úi salyndy, bul 2016 jylǵa qaraǵanda 9,8% artyq. 3,3 myńnan astam otbasynyń turǵyn úi jaǵdaiy jaqsartyldy. 2018 jyldyń I toqsanynda 113 100 m² nemese 2017 jyldyń osyndai kezeńimen salystyrǵanda 131% turǵyn úi paidalanýǵa berildi, 1,2 myńǵa jýyq otbasynyń turǵyn úi jaǵdaiy jaqsartyldy.
