Epidemiologiialyq jaǵdaidy eskere otyryp, karantindik rejimge ózgerister engizý jáne birtindep jeńildetý týraly tiisti sheshimder qabyldanady. Bul týraly QR Premer-Ministri Asqar Mamin Úkimet otyrysynda málimdedi, dep habarlaidy QazAqparat.
«20 sáýirden bastap, Nur-Sultan men Almaty qalalarynda karantindik rejim jeńildetildi. Sanitarlyq normalardy qatań saqtai otyryp, ekonomikanyń birqatar salasyndaǵy kásiporyndar jumysyn bastady. Sonyń ishinde qurylys, ónerkásip jáne qyzmet kórsetý salalaryndaǵy kásiporyndar. Epidemiologiialyq jaǵdaidy eskere otyryp, karantindik rejimge ózgerister engizý jáne birtindep jeńildetý týraly tiisti sheshim qabyldanatyn bolady. Basqa da kásiporyndar men biznes sýbektilerine jumysyn jalǵastyrýǵa ruqsat beriletin bolady. Mundai jumys elimizdiń basqa da óńirlerinde júrgiziledi. Degenmen, bul sanitarlyq-epidemiologiialyq qaýipsizdik qatań saqtalǵan jaǵdaida ǵana múmkin bolady. Eljan Amantaiuly (QR Densaýlyq saqtaý ministri Eljan Birtanov - red.), máseleni qatań baqylaýda ustańyz», - dedi Premer-Ministr Úkimettiń onlain otyrysynda.
Eske sala keteiik, QR Prezidenti janyndaǵy Tótenshe jaǵdai rejimin qamtamasyz etý jónindegi Memlekettik komissiiasy búginnen bastap Nur-Sultan jáne Almaty qalalarynda jumysyn bastaityn kásipkerlik sýbektilerdiń tizimin bekitti. Tizimde ónerkásiptik kásiporyndar, qurylys jáne jol-qurylys salalarynyń kompaniialary, iri qurylys dúkenderi, kólik, qoima kompaniialary, aýyl sharýashylyǵy maqsatyndaǵy servistik kompaniialar, avtosalondar, TQS, avtojýý, dóńgelek aýystyrý servisi, avtobólshekter dúkenderi, himiialyq tazalaý, keńse tehnikasyn jóndeý jáne ekinshi deńgeili bankter bar.
