QR Premer-Ministri Asqar Mamin qazaqstandyq ustazdar qaýymyn kásibi merekelerimen quttyqtady, dep habarlaidy "Ult aqparat".
«Pedagog – talmai ter tógýdi talap etetin, qoǵamdaǵy asa mańyzdy, qasterli mamandyqtardyń biri. Muǵalimniń eren eńbegi el bolashaǵy – jas urpaqtyń adamgershilik qundylyqtary men memlekettiń ziiatkerlik jáne ekonomikalyq áleýetiniń qalyptasýyna tikelei yqpalyn tigizedi.
Búgingidei kúrdeli kezeńde muǵalimderdiń bizdiń qoǵamnyń tynys-tirshiligindegi teńdessiz máni men aýqymdy róli aiqyn kórinis berip otyr. Ásirese, qazirgi jaǵdaida ustazdar qaýymy el kelesheginiń tizginin ustaityn óskeleń urpaqty zor yjdaǵattylyqpen bilim nárimen sýsyndatýdy jalǵastyra otyryp, úlken jaýapkershilikti kóterýdiń jáne boryshyn adal óteýdiń joǵarǵy úlgisin kórsetip, az ýaqyt ishinde oqytýdyń jańa formatyna beiimdelip úlgerdi.
Qurmetti ustazdar, eleýli eńbekterińiz úshin shyn júrekten alǵys aitamyz. Sizderge myqty densaýlyq, igilik pen tabys tileimiz!», - delingen quttyqtaý mátininde.
Aita ketsek, qazan aiynyń alǵashqy jeksenbisinde Qazaqstanda muǵalimderdiń kásibi merekesi atap ótiledi.
Bul ataýly kún 1965 jyly 29 qyrkúiekte KSRO Joǵarǵy Keńesi Prezidiýmynyń Buiryǵymen belgilengen. Búgingi tańda Qazaqstan, Belarýs, Latviia jáne Ýkraina Muǵalimder kúnin qazannyń alǵashqy jeksenbisinde atap ótedi. Al kórshiles Ózbekstan – 1 qazanda, Qyrǵyzstan, Ázerbaijan, Resei, Tájikstan, Armeniia, Moldaviia, Estoniia jáne Litva – ustazdar merekesin 5 qazan kúnine bekitken.
