Búgin Shymkenttegi «Kórme» ortalyǵynda Qazaqstan Respýblikasynyń Premer-ministri Baqytjan Saǵyntaevtyń tóraǵalyǵymen týrizm jáne kásipkerlik salalarynyń damý máseleleri men jumyspen qamtý, eńbek resýrstary boiynsha jiyn ótti. Otyrysqa elimizdiń birqatar ministrleri men soltústik oblystary ákimderiniń orynbasarlary, aýdan-qala ákimderi, basqarma basshylary men kásipkerler qatysty. Bul týraly OQO ákiminiń baspasóz qyzmeti habarlady.
Májiliske qatysýshylardy kún tártibimen tanystyrǵan Úkimet basshysy Elbasynyń tapsyrmasymen Ońtústik Qazaqstanǵa jasaǵan jumys sapary barysynda óńirdegi birqatar óndiris oryndaryn aralap, jumysymen tanysqanyn aitty. Sondai-aq, halyqty jumyspen qamtý jaiyn sóz etip, kóshi-qondaǵy qoldaý máselesin atap ótti.
«Ońtústik óńiriniń halqy isker, olardy úiretýdiń qajeti joq. Tek qana jumystyń jobasyn kórsetseń, ózderi alyp ketedi. Oblystyń ózin-ózi qamtamasyz etýge múmkindigi joǵary. Baý-baqshany damytý salasy boiynsha da sharýany alǵa qarai alyp kete alady. Kásipkerlikti damytý úshin berilip jatqan kómekter jetkilikti ma, qosymsha zańdardy qaita qarastyryp, sol arqyly kómek qajet pa, sol jaǵyn qarastyrýymyz kerek», - dedi Baqytjan Saǵyntaev.
Sonymen birge, Premer-ministr ońtústikten soltústik aimaqqa kóshý máselesine de toqtaldy. Bul baǵytta júieli jumystardyń atqarylý barysyn sóz etken Baqytjan Saǵyntaev kóship barǵan azamattarǵa jer berý, olardy turaqty jumyspen, baspanamen qamtý qajettigin atap ótti. Ásirese, iskerlik qabileti joǵary sharýalar men kásipkerlerdi jiberý qajettigin aitty.
Budan bólek, jiynda Ońtústik Qazaqstan oblysynyń ákimi Janseiit Túimebaev týrizm jáne kásipkerlik salalarynda atqarylǵan jumystar jaiyn baiandady. Memleket basshysynyń saiasatynyń arqasynda oblystyń damýy úshin barlyq múmkindikter jasalyp jatqanyn aitqan aimaq basshysy óńir halqynyń turmys-tirshiligin jaqsartý úshin alǵa qoiǵan mindetter oryndalýda dep málimdedi.
«Oblysymyzda indýstrialdy-innovatsiialyq damý baǵdarlamasy sátti júrgizilýde. Baǵdarlama aiasynda jalpy 208 mlrd teńgege 162 joba iske asyrylyp, 9,5 myń jańa jumys orny ashyldy. Onyń ishinde 2017 jyly 5 joba iske qosylyp, 2,3 mlrd teńge investitsiia tartyldy. Búgingi tańda iske qosylǵan jobalardyń 94%-y josparlyq qýattylyqty igerip, 71 mlrd teńgeniń ónimin óndirdi. Elbasynyń aýyl sharýashylyǵyn ekonomikalyq damýdyń jańa draiverine ainaldyrý jónindegi tapsyrmasyn oryndaý nátijesinde ónim kólemi ótken jyldyń tiisti kezeńimen salystyrǵanda 1,9%-ǵa artyp, 257,4 mlrd teńgeni qurady. Qazirgi kezde oblysta qolaily biznes klimatty qalyptastyrý jáne kásipkerlik bastamalardy iske asyrý úshin barynsha jaǵdai jasalýda»,- dedi J.Túimebaev.
Óńir basshysy munymen qosa oblysta «Agroónerkásip keshenin damytýdyń» memlekettik baǵdarlamasynyń talaptaryna sáikes keletin 158 kooperativ ashylǵanyn habarlady. Aýyl sharýashylyǵy salasyna baǵyttalǵan investitsiia kólemi 21,8 mlrd teńgeni qurap, ótken jyldyń tiisti kezeńimen salystyrǵanda 5,5 esege artqan. Aimaq basshysy osy saladaǵy ilkimdi isterdiń biri - biyl Shymkent mehanikalyq zaýytynyń bazasynda modýldik sút qabyldaý beketterin jinaý óndirisi bastalǵanyn aitty. Búgingi tańda 15 modýldik sút qabyldaý beketi kooperativterge qosymsha kepilsiz jáne aldyn ala tólemsiz nesiege berildi. Aita ketý kerek, bekettiń qunynyń 50 paiyzyn sýbsidiia retinde memleket tóleidi.
Basqosýda oblys ákimi Ońtústik Qazaqstan oblysynda týristik salanyń da turaqty damyp kele jatqanyn málimdedi. Oblysta týristik nysandar sany 195 birlikti qurap, tiisinshe 31 paiyzǵa ósken. Munda kórsetilgen qyzmet kólemi 1,7 mlrd teńgeni qurap, 43 paiyzǵa artqany baiqalady. Biyl oblysymyzǵa 128 myń týrist kelip, ótken jyldyń tiisti kezeńimen salystyrǵanda 55,3 paiyzǵa kóbeigen.
Keleli jiyn sońynda Qazaqstan Respýblikasynyń Premer-Ministri Baqytjan Saǵyntaev «Kórme» ortalyǵyna qoiylǵan taýar óndirýshilerdiń kórmesin tamashalady. Onda 69 kásipker tekstil, taǵam ónerkásibi, qurylys jáne mashina jasaý salasyndaǵy óz ónimderin usyndy. Delegattar kórmede dárilik preparattar, meditsinalyq quraldar, qurylys taýarlary men azyq-túlik ónimderin tamashalady. Sonymen qatar Úkimet basshysy modýldi sút qabyldaý beketteri men áleýmettik dúken úlgisimen tanysty. Premer-Ministr bul jobalardy joǵary baǵalap, ári qarai damytýdy tapsyrdy.
Úkimet basshysy Ońtústiktiń damýynyń áleýetti baǵyttary boiynsha jiyn ótkizdi
