QR Premer-Ministri Álihan Smaiylov halyqty qysqamerzimdi oqytýmen qamtý jáne kásiptik bilimi bar kadrlardy daiarlaýdy ulǵaitýdy tapsyrdy, dep habarlaidy QazAqparat.
«Memleket, kásiporyndar men oqý oryndarynyń arasyndaǵy jaýapkershilik anyq bólingende ǵana kadr daiarlaýdyń sapasy qamtamasyz etiledi. Muny álemdik tájiribe de anyq kórsetip otyr. Sondyqtan, ákimdikter kolledjder men kásiporyndardyń ózara tiimdi áriptestik ornatýy úshin sharalar qabyldaýy qajet. Iaǵni, kolledjderdi qamqorlyqqa alý, dýaldi oqytý júiesin damytýǵa jaǵdai jasalýy tiis. Mamandardy aldyn ala daiarlaý úshin «Jańa kásipter atlasyn» da paidalanǵan jón», - dedi Á. Smaiylov Úkimet otyrysynda.
Eń bastysy – kolledjder men ýniversitetterdiń túlekteri eńbek naryǵynda suranysqa ie bolýy kerek.
«Kadr daiarlaýda mamandarǵa degen qazirgi suranyspen qatar, eńbek naryǵynyń boljamdy derekteri de negizge alynýǵa tiis.
Bul mindetterdiń barlyǵy 2025 jylǵa deiingi bilim berýdi damytý tujyrymdamasynda eskerilýi kerek. Sonymen qatar, Eńbek ministrligi múddeli memlekettik organdarmen, ákimdiktermen jáne «Atameken» palatasymen birlesip, qysqamerzimdi oqytýdy ulǵaitý máselesin pysyqtap, onyń tiimdiligine monitoring júrgizýdi qamtamasyz etsin», - dedi Álihan Smaiylov.
Odan bólek, óńir ákimdikterine tehnikalyq jáne kásiptik bilimi bar kadrlardy daiarlaýǵa jergilikti biýdjetten bólinetin memlekettik bilim berý tapsyrysyn ulǵaitý, «Jas maman» jobasynyń negizinde kolledjderdi jaraqtandyrýǵa qarajat bólý, kásiporyndarmen birge mamandardy nysanaly túrde daiarlaýdy jolǵa qoiý tapsyrmalary berildi.
