Búginde bilim berý baǵdarlamalary boiynsha myńdaǵan mamandar daiarlanady. Alaida ekonomikaǵa múldem basqa mamandar qajet, dep xabarlaidy QazAqparat tilshisi.
«Ashyǵyn aitý kerek, búginde bilim berý baǵdarlamalary bar. Biraz mamandar daiarlanady. Alaida el ekonomikasyna múldem basqa mamandar qajet. Sonda usynys pen suranys sáikespeidi. Osy oraida biz Erlan Kenjeǵaliulymen (bilim ministri - avt.) ylǵi daýlasyp qalamyz. Demek, baǵdarlamalar durys emes, ia bolmasa, bilim berip jatqandar qajetti nárseni bilmeidi. Ádisteme durys emes pe? Áiteýir, ekonomikaǵa qajetti kadrlardy daiyndamaimyz», - dedi Úkimet basshysy Baqytjan Saǵyntaev «Atameken» ulttyq kásipkerler palatasynyń V sezinde.
Osy oraida Premer-Ministr Shymkent qalasyndaǵy bir zaýytqa jasaǵan saparyn eske aldy. Sol kezde atalǵan kásiporynnyń aktsioneri jańadan qurylǵan 600 jumys ornyna 100 mamandy syrttan ákeletinin jetkizdi.
«Men aitamyn, nege óz mamandarymyzdy almaisyzdar? Ondai kadrlar joq deidi. Sonda zaýyt eki jyl salyndy. Eki jylda oǵan qajetti maman daiyndai almadyq pa? Bailanys jasap, maman daiarlaýǵa bolady ǵoi. Osyǵan bailanysty tiisti tapsyrma berildi. Qazirgi kezde bilim berý baǵdarlamalaryn jańartyp jatyr», - dep atap kórsetti B.Saǵyntaev.
Aita keteiik, sezd kezinde Úkimet pen «Atameken» UKP arasynda jańa kelisimge qol qoiyldy. Sebebi kelesi aida besjyldyq kelisimniń merzimi aiaqtalady. Osyǵan bailanysty bilik kásipkerler uiymynyń quramynan shyǵady. Al qazirgi áriptestik jańa kelisimniń negizinde jalǵasady.
«Endi, ózderińiz jaqsy bilesizder, náreste dúniege kelgende ata-anasy ony álpeshtep ósiredi. Aiaǵyna turǵansha qamqorlyq jasaidy. Al aiaǵyna turyp ketken balanyń túisigi bolsa, ol ata-anasyna qamqorlyq jasaidy, ózine tirek bolady. «Atameken» bes jyldyń ishinde jyldap emes, kúnde ósti. Bes jylda júrip ótken jolyn qarańyzdar. Búginde «Atameken» Úkimettiń tiregine ainaldy. Bes jyl ótti. Endi, biz óz ókilettigimizdi toqtatyp, qazaqsha aitqanda «Atamekenniń» enshisin bólip berip, úlken jolǵa shyǵaryp otyrmyz. Bizdiń aitarymyz, aq jol!», - dedi QR Premer-Ministri Baqytjan Saǵyntaev.
Sondai-aq, sezd delegattary shaǵyn jáne orta biznesti jarna tóleýden taǵy úsh jylǵa bosatty.
