QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda elimizdiń balyq salasyn damytý perspektivalary qaraldy.
Balyq aýlaý jáne ony kóbeitý — azyq-túlik ónimi óndirisindegi basym salalardyń biri. Qazaqstanda taýarly balyq ósirýmen 180 balyq ósirý sharýashylyǵy ainalysady. Biylǵy aqpan aiynda Atyraý qalasynda Úkimet basshysynyń tóraǵalyǵymen ótken keńestiń qorytyndysy boiynsha ákimshilik kedergilerdi azaitýǵa jáne balyq sharýashylyǵy salasyn damytý úshin ońtaily jaǵdailar jasaýǵa baǵyttalǵan birqatar zańnamalyq bastamalar ázirlendi. Sý resýrstaryn paidalanǵany úshin tólemdi ońtailandyrýǵa, balyq ósirý sharýashylyǵyn (onyń ishinde sý qorǵaý beldeýinde) tiimdi aimaqtarǵa bólýge jáne ornalastyrýǵa, balyq aýlaýdyń jáne balyq aýlaityn kemeler jumysynyń tiimdi kestesin belgileýge, tyiym salynǵan balyq aýlaý quraldarynyń ainalymy úshin jaýapkershilikti belgileitin normalardy qatańdatýǵa erekshe nazar aýdaryldy. Barlyq qajetti zańnamalyq túzetýler biylǵy qyrkúiekte Parlamentke engiziledi.
Jemshópti sýbsidiialaý (25% deiin) jáne investitsiialyq shyǵyndardy óteý (30% deiin) turǵysynan qosymsha memlekettik qoldaý sharalary kórsetilip jatyr. Taýarly balyq ósirýdi damytýǵa baǵyttalǵan investitsiialyq jobalarǵa jeńildetilgen nesie berý kózdelgen.
Jalpy, sala aitarlyqtai áleýetke ie jáne serpindi ósim kórsetýde. Qabyldanyp jatqan sharalardyń arqasynda biyl ósirilgen taýarly balyqtyń kólemin sońǵy eki jylda 1,6 esege ósirip (2018 jyly – 5,6 myń tonna, 2019 jyly – 7,4 myń tonna), 9 myń tonnaǵa jetkizý josparlanyp otyr. Bul rette ósiriletin balyqtyń negizgi kólemi Túrkistan oblysy (shamamen 68%), Almaty, Soltústik Qazaqstan jáne Shyǵys Qazaqstan oblystaryna tiesili.
Premer-Ministr balyq óndirisiniń kólemi aitarlyqtai ulǵaiyp, 2030 jylǵa qarai 600 myń tonnaǵa deiin jetkizilýi múmkin ekenin atap ótti. Sonymen qatar balyq salasy AÓK qurylymynda negizgilerdiń birine ainalýy tiis, eksport kólemi 10 ese — 300 myń tonnaǵa deiin ulǵaitylyp, keminde 100 myń qosymsha jumys orny qurylýy tiis.
«Ár óńirde balyq óndirisi uiymdastyrylýy tiis, biznes sýbektilerine sý qoimalary bekitilip, jańa aýlanǵan sapasy joǵary balyq satatyn saýda oryndarynyń sanyn arttyrý kerek. Azamattardyń paidaly tamaqtaný ratsionyn qamtamasyz etý úshin Dúniejúzilik densaýlyq saqtaý uiymynyń usynysy boiynsha bir adamǵa balyqty tutyný deńgeiin 16 kilogramǵa jetkizý kerek (búginde QR-da — jylyna 3-4 kg)», — dedi A. Mamin.
Úkimet basshysy biylǵy 1 qarashaǵa deiin balyq sharýashylyǵyn damytýdyń óńirlik baǵdarlamalaryn ázirleýdi jáne bekitýdi tapsyrdy, onda basym sýbsidiialaý, jer telimderin bólý, infraqurylym júrgizý boiynsha naqty indikatorlar men is-sharalar jáne basqa da memlekettik qoldaý sharalary kórsetilýi tiis.
Ekologiia ministrligine múddeli memlekettik organdarmen birge bir ai merzimde biznes qaýymdastyqtarmen balyq sharýashylyǵy salasyn sýbsidiialaýdy keńeitý jónindegi usynystardy pysyqtaý, Bilim jáne ǵylym ministrligimen birge joǵary oqý oryndarynyń oqý jáne tájiribelik baǵdarlamalaryn balyq aýlaýdan balyq ósirýge basa nazar aýdara otyryp, qaita qaraý tapsyryldy.
Qarjy ministrligine saýda ministrligimen birge shet elden balyqtyń baǵaly túrleriniń balyq ósirý materialyn jetkizýdi jáne olardy tasymaldaý kezinde shekarada baqylaýdyń barlyq túrlerinen ótýdi rásimdeý rásimin ońailatý jónindegi usynystardy pysyqtaý tapsyryldy.
Jiynda Ekologiia, geologiia jáne tabiǵi resýrstar ministri M. Myrzaǵaliev, aýyl sharýashylyǵy ministri S. Omarov, sondai-aq «Hamit» balyq sharýashylyǵynyń ókili B. Sermanizov, «Caspian Riviera» balyq sharýashylyǵynyń ókili R. Hamitova, «KingFish» balyq sharýashylyǵynyń ókili M. Tursynáli baiandama jasady.
