Búgin Úkimet otyrysynda aýyl sharýashylyǵy salasyndaǵy sýbsidiianyń tiimdiligin arttyrý máselesi qaraldy, dep habarlaidy QazAqparat.
Premer-Ministr Álihan Smaiylov sýbsidiia alýshylar úshin aldaǵy ýaqytta qandai qarsy mindettemeler qoiylatynyn jáne osy mindettemelerdiń oryndalýy deńgeii qalai baqylanatynyn surady.
Óz kezeginde QR Aýyl sharýashylyǵy ministri Erbol Qarashókeev qazirgi kezde sýbsidiia alýshylarǵa birde-bir qarsy mindemeleler qoiylmaǵanyn eske saldy.
«Sol sebepti alynǵan sýbsidiialardy paidalaný barysynda jaýapkershilik óte tómen, sondai-aq tiimdiligi de shektelip otyr. Sondyqtan tiisti qarsy mindettemelerdi engizýdi josparlai kele, barlyq sýbsidiia alýshylar úshin óndiris kólemin tómendetpeý, mal sharýashylyǵynda jyl saiyn mal basyn keminde 5 paiyzǵa ulǵaitý, 100 analyqqa shaqqanda keminde 80 bas tól alý eskerilip otyr. Ósimdik sharýashylyǵyna toqtalsaq, tuqym sharýashylyǵy egistikteriniń úles salmaǵyn 15 paiyzdan kem bolmaý mindettemesin de josparlap otyrmyz», - dedi ministr
Onyń aitýynsha, investitsiialyq sýbsidiialaý kezinde fermelerdiń jobany kórsetilgen merzimde paidalanýǵa berýi nazarǵa alynady.
«Odan basqa, jobalyq qýatyna der kezinde qol jetkizilýin kózdep otyrmyz. Osynyń bári arnaiy qurylǵan jumys tobynda talqylanyp, maquldanǵannan keiin engizetin bolamyz. Eń mańyzdysy, qoiylǵan qarsy mindettemelerdiń oryndalýyn baqylaý protsesi adamnyń qatysýynsyz tsifrlyq tehnologiialar negizinde engizilmek. Sýbsidiialaýdyń biryńǵai memlekettik aqparattyq júiesinde avtomattandyrylǵan túrde engiziledi», - dedi Erbol Qarashókeev.
Osy oraida Úkimet basshysy Á. Smaiylov baqylaýdy tsifrlandyrý arqyly júrgizý kerek ekenin qoldady.
«Degenmen qarsy mindettemelerdiń tizimin taǵy da bir pysyqtap shyǵý kerek. Qarsy mindettemeler aýyl sharýashylyǵy óniminiń tiimdiligin kóterý kerek. Osy jumysty yntalandyrý mańyzdy. Sondyqtan bul máseleni jumys tobynda pysyqtap, tiisti usynystardy engizińizder», - dedi Premer-Ministr.
