Foto: QR Úkimetiniń baspasóz qyzmeti
Premer-Ministr Álihan Smaiylov «ArselorMittal Temirtaý» kásipornyn qaitarýǵa qatysty túsinik berdi, dep habarlaidy Kazinform.
«Biz qazir osy baǵytta naqty jumys istep jatyrmyz jáne biz ózimizge sońǵy merzim belgiledik. Iaǵni qarashanyń aiaǵyna deiin kelisimshartty bekitý eskerilgen. Barlyq jospar oidaǵydai iske asyrylsa, kelesi aptada biz ony aiaqtap, shart nátijesin jariialaimyz. AMT kásipornyn satyp alýǵa biýdjet qarajaty jumsalmaitynyna, investordyń qarajaty tartylatynyna taǵy da nazarlaryńyzdy aýdarǵym keledi. Investordyń qarajaty esebinen biz bul kásiporyndy Mittaldan qaitaryp alamyz», - dedi Smaiylov Senattyń jalpy otyrysynan keiin tilshiler suraǵyna jaýap bere otyryp.
Onyń aitýynsha, aldyn ala kelisim bir ai buryn jasalǵan.
«Al endi biz kelesi aptada jospar boiynsha satyp alý-satý jónindegi qorytyndy kelisimge qol qoiýymyz kerek. Bul kelisimge qol qoiylmai turyp, biz investordyń kim ekenin aita almaimyz. Biraq budan keiin mindetti túrde habarlaimyz», - dep ýáde berdi Premer-Ministr.
Buǵan deiin Ónerkásip jáne qurylys ministri Qanat Sharlapaev atalǵan kásiporyn aktivin Qazaqstan Respýblikasynyń paidasyna ótkizýge mindetteitin zańdy qujatqa qol qoiǵansha, kelisimniń qandai da bir shartyn aita almatynyn málim etti.
