QR Premer-Ministri Asqar Mamin básekelestikti damytýdyń jańa tásilderi jóninde birqatar tapsyrma berdi, dep habarlaidy "Ult aqparat".
«Adal báseke - elimizdiń jańa ekonomikalyq baǵdarynyń negizgi bolatyn basty qaǵidattardyń biri ekenin Memleket basshysy atap ótken. Sondyqtan básekelestiktiń uzaqmerzimdi jańa saiasatyn jasaýdyń mańyzy zor. Bul báseke men «jumsaq quqyq» quraldaryn keńinen qoldaný úshin neǵurlym jetildirilgen jaǵdailar jasaýdy talap etedi, munyń ózi zańnamany buzý qaýpin tómendetedi. Prezident tapsyrmalaryn iske asyrý úshin básekelestikti damytý máseleleri boiynsha Zań jobasy ázirlendi, ol boiynsha 4 kodeks pen 6 zańǵa ózgerister men tolyqtyrýlar engiziledi», - dedi A. Mamin Úkimettiń búgingi otyrysynda.
Bul zań jobasynda básekelestikti damytýdyń bazalyq ekonomika salalarynda, taýar naryqtarynyń, atap aitqanda, bailanys, temirjol júk jáne jolaýshylar tasymaly, áýejai qyzmetteri, agroónerkásip kesheni, kómir, farmatsevtika, qurylys jáne taǵy da basqa naryqtarynyń jumys isteýinde básekeli ortany keńeitýge baǵyttalǵan jańa tásilderi kózdeledi.
«Osyǵan bailanysty kelesi máselelerge nazar aýdarǵym keledi. Birinshi, básekelestikti damytý – birjalyq saýda quraldaryn damytý jáne negizgi infraqurylymdyq qýattarǵa qol jetkizý sharttaryn keńeitý arqyly júzege asyrylýǵa tiis. Naryq sýbektileriniń osy qýattarǵa qol jetkizýi qanshalyqty arzan, ári jeńil bolsa, sońǵy tutynýshy úshin baǵa da sonshalyqty tómen bolmaq. Osyǵan bailanysty Básekelestikti qorǵaý jáne damytý agenttigi birja arqyly jumys istemeitin sýbektilerdiń shekteýli resýrstaryna qol jetkizý sharttaryn ázirleý qajet», - dedi Premer-Ministr.
Ekinshiden, Úkimet basshysy qazirgi ýaqytta biryńǵai operatorlar qurý jolymen naryq sýbektilerine airyqsha quqyq bekitip berý praktikasy qalyptasqanyn eske saldy.
«Bul básekeni shekteidi. Memleket basshysynyń qandai da bir airyqsha quqyq berilgen kásipkerlik sýbektilerin qurýǵa moratorii engizý jónindegi tapsyrmalaryn oryndaý sheńberinde agenttik ártúrli salalardaǵy memlekettik jáne jeke operatorlardyń qyzmetin retteý normalaryn qaita qaraýy qajet. Úshinshi, usynylǵan Zań jobasy jańa tásilderdi iske asyrýdy qamtidy jáne básekeniń damýyna kedergi keltiretin ákimshilik jáne ekonomikalyq shekteýlerdi joiýǵa baǵyttalǵan. Zań jobasynda usynylatyn sharalardy iske asyrý taiaý perspektivada memlekettiń el ekonomikasyna qatysý úlesin 14% deiin azaitýǵa múmkindik beredi. Sondyqtan usynylyp otyrǵan tásilderdi maquldap, osy zań jobasy úshin daýys berýdi suraimyn», - dedi Asqar Mamin.
Úkimet otyrysyna qatysyp otyrǵan barlyq 22 adam daýys berdi. Qalys qalǵandar joq.
«Sheshim qabyldandy. Básekelestikti qorǵaý jáne damytý agenttigi Zań jobasyn Parlamentte engizýdi qamtamsyz etsin. Baqylaý Álihan Ashanulyna júkteledi», - dedi Premer-Ministr.
