Elimizde úlestik qurylys boiynsha qurylys kompaniialarynyń reitingi túziledi. Bul týraly Úkimet otyrysynda turǵyn úi saiasatynyń jańa tásilderin jariialaǵan QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Sondai-aq, ministrlik turǵyn úi qurylysyn damytýǵa arnalǵan qosymsha sharalar usynady: jalǵa beriletin turǵyn úi pýlyn qalyptastyrý jáne jyljymaityn múliktiń jeke áleýmettik qorlaryn qurýdy yntalandyrý; naryqtyq qorlandyrýdy tartý jáne qaryz boiynsha shyǵystardy sýbsidiialaý; jeke qurylys salýshylardy jobalyq qarjylandyrý tetigin engizý; úlestik qurylys boiynsha qurylys kompaniialarynyń reitingin engizý; josyqsyz qurylys salýshylardyń jaýapkershiligin qatańdatý», - dedi Beibit Atamqulov.
Onyń aitýynsha, osy sharalar qabyldanǵan jaǵdaida elimizdiń barlyq óńirinde qosymsha 1,7 mln sharshy metr baspana nemese 28 myń páter salynady.
«Turǵyn úi qurylysyna salynatyn investitsiia qosymsha 300 mlrd teńgeni quraidy. Bul: 55 myń jumys ornyn ashýǵa; - 40 mlrd teńge salyq túsimin qamtamasyz etýge; 530 mlrd teńgege taýarlar óndirý, jumystar men qyzmet kórsetý arqyly aralas salalardy iske tartýǵa múmkindik beredi», - dedi ministr.
