QR Ulttyq ekonomika ministri Rýslan Dálenov áleýmettik mańyzy bar taýarlardyń qymbattaýy jóninde baiandady, dep habarlaidy QazAqparat.
«Jyl basynan bastap, infliatsiia 4-6% dáliz sheginde saqtalýda. Jyldyq infliatsiia 5,4% deńgeiinde qalyptasty, al 2018 jyldyń shildesinde ol 5,9% quraǵan. Infliatsiianyń ósýine eń kóp áser etken - azyq-túlik taýarlary. Olardyń infliatsiia ósimine qosqan salymy 3,4 protsenttik tarmaqty qurady. Bul taýarlar baǵalar ósýiniń shamamen 63% qurady», - dedi ministr Úkimettiń búgingi otyrysynda.
Onyń aitýynsha, barlyq óńirlerde áleýmettik mańyzy bar azyq-túlik taýarlarynyń baǵasy infliatsiiadan asady.
«Ásirese, áleýmettik mańyzy bar 19 azyq-túlik taýarlary 9% ulǵaiǵan. Eń joǵary ósý Nur-Sultan (15,1%), Jezqazǵan (11,8%) jáne Taldyqorǵan (10,4%) qalalarynda baiqalady. Mysaly, Nur-Sultan qalasynda sábiz (2,4 ese), piiaz (85,5%), kartop (82,4%), kúrish (21,6%) jáne un (20,8%) qymbattady», - dep óz sózin jalǵastyrdy R. Dálenov.
Jalpy, respýblika boiynsha áleýmettik mańyzy bar azyq-túlik taýarlary arasynda piiaz (79,0%), sábiz (59,3%), kartop (32,9%), kúrish (23,8%), birinshi surypty un (15,3%) baǵalary aitarlyqtai ósken. Taýarlar baǵasyna taldaý júrgizilgende, tutynýshylar baǵasynyń óndirýshilerdiń nemese importtyq baǵalardan edáýir joǵary ekeni anyqtalǵan.
«Mysaly, sábizdi óndirýshi baǵasy 67 teńge bolsa, naryqtaǵy satý baǵasy 151 teńgeni quraidy. Ústeme baǵa retinde 84 teńge qosylǵan. Biz biyl infliatsiiany berilgen dálizde ustap qalý úshin 10 taýardy anyqtadyq. Bul piiaz, sábiz, kartop, qyzylsha, kúrish, un, jylqy eti, qoi eti, siyr eti jáne nan. Taýarlardyń osy toby boiynsha kúsheitilgen baqylaý júrgizý, sondai-aq olardyń baǵalaryn tómendetý boiynsha sharalar qabyldaý usynylady» - dedi Ulttyq ekonomika ministri.
