Úkimet pandemiiamen kúreste jedel sheshimder qabyldaýdyń quqyqtyq algoritmin daiyndaidy. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy Aqorda baspasóz qyzmeti.
«Úkimetten 5 kúnniń ishinde pandemiiamen jáne onyń saldarymen kúres bóliginde jedel sheshimder qabyldaýdyń quqyqtyq algoritmin daiyndaýdy suraimyn. Mundai sipattaǵy sheshimder bir, ary ketkende eki táýlik merzimniń ishinde qabyldanyp, júzege asyrylýy tiis»,- dedi QR Prezidenti.
Aita keteiik, videobailanys arqyly ótip jatqan jiynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomikalyq damý qorytyndysy týraly esep berdi. Sondai-aq koronavirýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boiynsha bergen tapsyrmalary men mindetteri qarastyryldy.
Elimizdiń áleýmettik-ekonomikalyq damýynyń qorytyndylary men jyl sońyna deiin oryndaityn mindetter jóninde Premer-Ministr Asqar Mamin, aqsha-nesie saiasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epidemiologiialyq ahýaldy jaqsartý jónindegi sharalar týraly Densaýlyq saqtaý ministri Aleksei Tsoi baiandama jasady.
