Ýhan qalasynan jetkizilgen PhD stýdenti Gúlbaqyt Bolatbekqyzy karantinniń qalai júrgizilgenin aityp berdi, dep habarlaidy QazAqparat.
«Ýhan qalasyn karantinge jabý týraly habar 22 qańtar kúni kelip tústi. Bul ýaqytta Qytai halqynyń Jańa jyly toilanady. Onda 2-3 jyldan beri turyp jatqandyqtan, jańa jylda dúkenderdiń jabylatynyn bilemiz. Bul joly da azyq-túlikti aldyn ala satyp alǵanbyz. Karantin kezinde barlyq kólik joldary jabylady. Vokzal, áýejai jumys istemeidi. Tótenshe jaǵdai rejimi engizildi. 22 qańtardan 2 aqpanǵa deiin kampýsta, óz bólmemizde otyrdyq. Ár korpýs óz stýdentteri úshin jaýapty boldy. Tek azyq-túlik alý úshin kýratorǵa eskertip, kampýstan shyǵatynbyz. Onda da betperde, kózildirik, qolǵap kiip, eshkimmen bailanyspaýǵa tyrystyq. Barlyǵy uiymdastyryldy. Áleýmettik jelide aitylǵandai esh dúrligý bolǵan joq. Bir úzim nan úshin tóbelesý bolǵan joq», - dedi G. Bolatbekqyzy Ortalyq kommýnikatsiialar qyzmetinde ótken baspasóz máslihatynda.
Osylaisha, Ýhan stýdentteri jalpy eseppen 24 kún karantinde bolǵan.
«22 qańtar - 2 aqpan aralyǵynda 10 kún kampýsta otyrdyq. Oǵan qosa, Qazaqstanda 14 kún oqshaý ómir súrdik. Bizdi Nur-Sultandaǵy kópbeiindi aýrýhanaǵa jatqyzdy. Mamandar qajetti saraptamalardyń bárin jasady. Eshqaisysynan koronavirýs tabylǵan joq. Tótenshe jaǵdai bolmaǵanda, bizde kýrorttyq demalys boldy dep aitýǵa bolady. Kúnine 4 ret tamaqtandyryp, densaýlyǵymyzdy jiti tekserdi. Kei adamdar stresti jaǵdaiǵa túskendikten, dárigerler olarmen úzdiksiz sóilesip otyrdy. Pijamaǵa deiin qajetti kiimdi aýrýhananyń ózi berdi. Osynyń barlyǵyn mamandar jedel uiymdastyra aldy jáne olarǵa zor alǵys aitamyz», - deidi stýdent.
Sonymen birge, onyń aitýynsha Qazaqstan men Qytaidyń bilim ministrlikteri stýdentterdiń oqýyn jalǵastyrý máselesin talqylaǵan.
«Mundaǵy áńgime Qytaiǵa ekijaqty baǵdarlamamen barǵandar nemese tildik kýrs oqityndar jáne bakalavr, magistratýra, doktorantýra oqityndar jaiynda bolyp otyr. Stýdentterdiń bir bóligi Qazaqstanǵa aýysýdy kózdep otyr. Al kei stýdentter shekara ashylǵan soń, oqýyn Qytaida jalǵastyrǵysy keledi. Bul sheshimdi ár stýdent ózi derbes qabyldaidy», - deidi Gúlbaqyt Bolatbekqyzy.
Aita keteiik, keshe Qytaidan evakýatsiialanǵan 89 stýdent elordadaǵy kópsalaly meditsinalyq ortalyqtyń juqpaly aýrýlar bóliminen jáne 171 qazaqstandyq Almatydaǵy statsionarlardyń birinen shyǵaryldy.
Sońǵy derekterge sáikes, Qytaida koronavirýstan kóz jumǵandar sany 1770 adamǵa jetti .
