QR Bas sanitarlyq dárigeri Jandarbek Bekshin Ýhan qalasynan evakýatsiialanǵan azamattardyń jaǵdaiy týraly aitty, dep habarlaidy QazAqparat.
«Keshe Ýhan qalasynan 89 adam evakýatsiialandy. Olardyń arasynda 83 qazaqstandyq (olardyń 80-i stýdent), 5 Belarýs azamaty jáne bir Armeniia azamaty bar. Olardyń barlyǵynan synama alyndy, jaǵdailary qanaǵattanarlyq. Dene qyzýy qalypty, shaǵym joq. Kelgenderdiń eshqaisynynan koronavirýs tabylmady. Bul zerthanalyq túrde dáleldendi. Soǵan qaramastan, olar barlyǵy 14 kún karantinde bolady», - dedi Jandarbek Bekshin Qazmedia ortalyǵynda ótken brifingte.
Aita keteiik, 2020 jyldyń 2 aqpanynda QR DSM Ulttyq shuǵyl meditsina úilestirý ortalyǵy Qytaidyń Ýhan qalasynan 83 qazaqstandyqty, onyń ishinde 80 stýdentti elge jetkizdi.
Olar elordadan 7 shaqyrym jerde ornalasqan kópbeiindi aýrýhana janyndaǵy infektsiiaǵa qarsy arnaiy bólingen korpýsta 14 kúndik karantinge jatqyzyldy.
