Sýret: den-der.kz
Májilis pen máslihat depýtattarynyń sailaý naýqanynda úgit jumystaryna ruqsat berilmei jatyp, nasihatpen ainalysqandar jaýapqa tartyldy. Bul týraly Ortalyq sailaý komissiiasynyń otyrysyna qatysqan Bas prokýrordyń orynbasary Jandos Ómiráliev málim etti, dep habarlaidy QazAqparat.
«Búgingi tańda sailaý boiynsha qoǵamdyq pikirge saýalnama júrgizýdiń, sondai-aq sailaý aldyndaǵy úgitti júrgizýdiń belgilengen tártibi men sharttaryn saqtamaýmen ushtasqan birqatar zań buzýshylyqtar tirkeldi. Olardyń bireýi elordada bolǵan. Kináli adamǵa Astana qalasy Saryarqa aýdany prokýrorynyń qaýlysymen qysqartylǵan is júrgizý tártibinde Ákimshilik quqyq buzýshylyq týraly Kodekstiń 120-baby 3-bóligi boiynsha 7,5 AEK mólsherinde ákimshilik aiyppul salyndy», - dedi Jandos Ómiráliev.
Buǵan qosa, kandidattar men partiialyq tizimderdi tirkeý aiaqtalǵanǵa deiin úgit júrgizgen 5 zań buzýshylyq faktisi anyqtalǵanyn atap ótti.
«Bireýi boiynsha Taldyqorǵan qalasynyń turǵyny WhatsApp messendjerinde úgit júrgizgeni úshin sot qaýlysymen aiyppul túrinde ákimshilik jazaǵa tartyldy. Qalǵandary boiynsha kinálilerdi osy bappen jaýapqa tartý jónindegi sharalar qabyldanyp jatyr», - dep toqtaldy Bas prokýrordyń orynbasary.
Ol anyqtalǵan zań buzýshylyq faktileri boiynsha tiisti zańnamada kózdelgen quqyqtyq sharalar qabyldanatynyn eskertti.
