Sharshy alańda jeńilip kórmegen qazaqstandyq sportshy Shavkat Rahmonovqa álemdegi eń mártebeli UFC promoýshen jekpe-jek ótkizýge usynys jasady. Bul týraly «BE STRONG PROMOTION» kompaniiasynyń baspasóz qyzmetinen málim etti, dep habarlaidy QazAqparat tilshisi.
«UFS aýyly alysta emes. Kúni keshe ǵana UFS Shavkatqa 20 sáýirde Sankt-Peterbor týrnirinde birinshi ret sharshy alańǵa shyǵýyn kózdeitin 4 jekpe-jekke kelisimshart usynǵan bolatyn», - dedi «BE STRONG PROMOTION» vitse-prezidenti Asylbek Dúisenov.
Alaida, qazaqstandyq sportshy mundai usynystan bas tartyp otyr. Sebebi 30 naýryzda Shavkat Almatyda M-1 Global ligasynyń chempiony ataǵy úshin titýldyq jekpe-jekke shyǵatyn bolady. Qarsylasy osyǵan deiin 14 aiqas ótkizip, onyń 10-ynda jeńiske jetken - Danila Prikaza.
«Komandamyz úshin, árine, Shavkattyń ózi úshin de sheshim qabyldaý ońaiǵa soqqan joq. Bul máseleni «BE STRONG PROMOTION» prezidenti Anatolii Kimmen jáne Baian Janǵalievpen talqylap, qorytyndysynda Shavkat chempion ataǵy úshin jekpe-jekke shyǵý sheshimin qabyldady. Onyń birneshe sebebi de bar. Birinshiden, kez kelgen isti sońyna deiin jetkizý qajet. Qazaqstannan shyqqan M-1 Global-dyń birinshi chempiony bolýy maqsatynda bir qadam qalǵanda tastap ketý qurmetke laiyqty emes is. Al biz Shavkat Rahmonovtyń óz maqsatyna qol jetkizýge daǵdylanǵanyn bilemiz», - dedi Asylbek Dúisenov.
Osy oraida ol Shavkat ulttyq qurama sapyndaǵy eń jas sportshy bolǵan kezinde-aq áýesqoilar arasynda MMA boiynsha álem chempiony atanǵanyn eske saldy.
«Ekinshiden, Shavkat titýldyq jekpe-jek úshin uzaq joldan ótti jáne ózgelerge qaraǵanda chempiondyq ataq úshin kúresýge laiyqty. Barlyǵy da osy kezdesýdi taǵatsyzdana kútip otyr. Sondyqtan jankúierler men týrnir uiymdastyrýshylarynyń úmitin aldaǵymyz kelmeidi. Úshinshiden, eger Shavkat M-1 belbeýin jeńip alatyn bolsa, onda kelisimshartqa sáikes ol ataǵyn keminde bir ret qorǵaýy tiis. Mine, osydan keiin ol UFC-di baǵyndyrýǵa daiyn bolady. Biz álemdegi eń mártebeli ligaǵa jai ǵana kirip qoimai, onyń tarihynda uzaq ýaqyt qalǵymyz keledi», - dedi ol.
