Búgin fýtboldan Túrkiianyń Stambýl qalasyndaǵy «Vodafon Park» stadionynda ótken UEFA sýperkýbogynda Angliianyń «Liverpýl» komandasy jeńimpaz atandy, dep habarlaidy "Ult aqparat".
UEFA sýperkýbogynda aǵylshyndyq «Liverpýl» jáne «Chelsi» komandalary kezdesti. Match óte tartysty órbidi. Qos komanda tarapynan da alma-kezek shabýyl boldy. Birinshi kezeńniń 36-minýtynda «Chelsi» shabýylshysy Olive Jirý qarsylastar qaqpashysyn qapy qaldyrdy. Budan keiin de olar taǵy bir gol soqqan bolatyn. Degenmen ony tóreshiler londondyq fýtbolshy oiynnan tys qaldy degen sheshimmen sanaǵan joq.
Ekinshi kezeńniń basynda «Liverpýl» komandasy tarazy basyn teńestirdi. Ony 48-minýtta Sadio Mane soqty. Qos komanda budan keiin jii-jii shabýylǵa shyǵyp jatty. Negizgi kezeńde 1:1 esebi tirkeldi. Oiyn overtaimǵa ulasty.
Overtaimda qos komanda bir-bir goldan soqty. Aldymen 95-minýtta Sadio Mane taǵy bir goldyń avtory atandy. Al 101-minýtta «Chelsi» sapynan Jorjino tarazy basyn teńestirdi. Overtaimda da komandalar teń tústi.
Jeńimpaz penalti tebý arqyly anyqtaldy. Bul joly «Liverpýl» komandasynyń joly boldy. «Liverpýl» osylaisha 14 jyl burynǵy jetistigin taǵy bir márte qaitalady.
Esterińizge sala ketelik, biyl UEFA Chempiondar ligasynda «Liverpýl» komandasy jeńimpaz atansa, UEFA Eýropa ligasynda «Chelsi» klýby kýbokty tóbesine kóterdi. Sýperkýbok oiyndary 1972 jyldan beri turaqty túrde ótkizilip keledi.
Búgingi kúnge deiin Ispaniianyń «Barselona» jáne Italiianyń «Milan» komandalary bes-bes márteden atalmysh týrnirde chempion atandy. Sondai-aq, Ispaniianyń «Real Madrid», «Atletiko Madrid», Angliianyń «Liverpýl», Gollandiianyń «Aiaks» komandalary úsh-úshten, Belgiianyń «Anderleht», Ispaniianyń «Valensiia» jáne Italiianyń «Iýventýs» komandalary eki-ekiden jeńimpaz tuǵyrynan kóringen edi. Al 15 komanda bir-bir márteden sýperkýbokty tóbesine kóterdi. Mundai mártebege sońǵy ret «Liverpýl» 2005, «Chelsi» 1998 jyly qol jetkizgen bolatyn.
Jeńimpazdardy marapattaý rásimine qazaqstandyq «Nik Výichich» atanǵan Áli Turǵanbekov te qatysty. Ol budan buryn sýperkýbokqa daiyndalyp jatqan «Liverpýl» komandasynyń jabyq jattyǵýynda bolǵan edi.
