بٷگٸن فۋتبولدان تٷركييانىڭ ستامبۋل قالاسىنداعى «ۆودافون پارك» ستاديونىندا ٶتكەن UEFA سۋپەركۋبوگىندا انگلييانىڭ «ليۆەرپۋل» كومانداسى جەڭٸمپاز اتاندى, دەپ حابارلايدى "ۇلت اقپارات".
UEFA سۋپەركۋبوگىندا اعىلشىندىق «ليۆەرپۋل» جەنە «چەلسي» كوماندالارى كەزدەستٸ. ماتچ ٶتە تارتىستى ٶربٸدٸ. قوس كوماندا تاراپىنان دا الما-كەزەك شابۋىل بولدى. بٸرٸنشٸ كەزەڭنٸڭ 36-مينۋتىندا «چەلسي» شابۋىلشىسى وليۆە جيرۋ قارسىلاستار قاقپاشىسىن قاپى قالدىردى. بۇدان كەيٸن دە ولار تاعى بٸر گول سوققان بولاتىن. دەگەنمەن ونى تٶرەشٸلەر لوندوندىق فۋتبولشى ويىننان تىس قالدى دەگەن شەشٸممەن ساناعان جوق.
ەكٸنشٸ كەزەڭنٸڭ باسىندا «ليۆەرپۋل» كومانداسى تارازى باسىن تەڭەستٸردٸ. ونى 48-مينۋتتا ساديو مانە سوقتى. قوس كوماندا بۇدان كەيٸن جيٸ-جيٸ شابۋىلعا شىعىپ جاتتى. نەگٸزگٸ كەزەڭدە 1:1 ەسەبٸ تٸركەلدٸ. ويىن وۆەرتايمعا ۇلاستى.
وۆەرتايمدا قوس كوماندا بٸر-بٸر گولدان سوقتى. الدىمەن 95-مينۋتتا ساديو مانە تاعى بٸر گولدىڭ اۆتورى اتاندى. ال 101-مينۋتتا «چەلسي» ساپىنان جورجينو تارازى باسىن تەڭەستٸردٸ. وۆەرتايمدا دا كوماندالار تەڭ تٷستٸ.
جەڭٸمپاز پەنالتي تەبۋ ارقىلى انىقتالدى. بۇل جولى «ليۆەرپۋل» كومانداسىنىڭ جولى بولدى. «ليۆەرپۋل» وسىلايشا 14 جىل بۇرىنعى جەتٸستٸگٸن تاعى بٸر مەرتە قايتالادى.
ەستەرٸڭٸزگە سالا كەتەلٸك, بيىل UEFA چەمپيوندار ليگاسىندا «ليۆەرپۋل» كومانداسى جەڭٸمپاز اتانسا, UEFA ەۋروپا ليگاسىندا «چەلسي» كلۋبى كۋبوكتى تٶبەسٸنە كٶتەردٸ. سۋپەركۋبوك ويىندارى 1972 جىلدان بەرٸ تۇراقتى تٷردە ٶتكٸزٸلٸپ كەلەدٸ.
بٷگٸنگٸ كٷنگە دەيٸن يسپانييانىڭ «بارسەلونا» جەنە يتالييانىڭ «ميلان» كوماندالارى بەس-بەس مەرتەدەن اتالمىش تۋرنيردە چەمپيون اتاندى. سونداي-اق, يسپانييانىڭ «رەال مادريد», «اتلەتيكو مادريد», انگلييانىڭ «ليۆەرپۋل», گوللاندييانىڭ «اياكس» كوماندالارى ٷش-ٷشتەن, بەلگييانىڭ «اندەرلەحت», يسپانييانىڭ «ۆالەنسييا» جەنە يتالييانىڭ «يۋۆەنتۋس» كوماندالارى ەكٸ-ەكٸدەن جەڭٸمپاز تۇعىرىنان كٶرٸنگەن ەدٸ. ال 15 كوماندا بٸر-بٸر مەرتەدەن سۋپەركۋبوكتى تٶبەسٸنە كٶتەردٸ. مۇنداي مەرتەبەگە سوڭعى رەت «ليۆەرپۋل» 2005, «چەلسي» 1998 جىلى قول جەتكٸزگەن بولاتىن.
جەڭٸمپازداردى ماراپاتتاۋ رەسٸمٸنە قازاقستاندىق «نيك ۆۋيچيچ» اتانعان ەلي تۇرعانبەكوۆ تە قاتىستى. ول بۇدان بۇرىن سۋپەركۋبوكقا دايىندالىپ جاتقان «ليۆەرپۋل» كومانداسىنىڭ جابىق جاتتىعۋىندا بولعان ەدٸ.
