Búgin, 22 shildede UEFA Konferentsiia ligasy ekinshi irikteý satysyndaǵy alǵashqy kezdesýde elordalyq «Astana» Grekiianyń «Aris» komandasynan basym tústi, dep habarlaidy "Ult aqparat".
Oiyn basynan eki komanda bir-biriniń qaqpasyna gol soǵatyn múmkindikti izdedi. Negizinen «Astana» alǵa qarai jii umtyldy. Óziniń alańynda jeńiske jetken jaǵdaida jarystyń kelesi satysyna shyǵýǵa múmkindik arta túsedi. Elordalyq klýb fýtbolshylary osyndai oimen jasyl alańǵa shyqty.
Nátijesinde 24-minýtta elordalyq klýbtan Marin Tomasov qaqpany dál kózdep, óziniń komandasyn alǵa shyǵardy. Budan keiin eki komanda da gol soǵatyn sátter de kezdesti. Birinshi kezeńde tablodaǵy esep ózgergen joq.
Ekinshi kezeńde Marin Tomasov shabýyl shebinde jii boi kórsetti. Ol 70-minýtta óziniń ekinshi golyn soǵyp, «Astananyń» basymdyǵyn arttyra tústi.
Kezdesýde «Astana» qarsylasynan 2:0 esebimen basym tústi. Qarymta kezdesý 29 shildede Grekiiada ótkiziledi.
UEFA qaramaǵyndaǵy Chempiondar ligasy men Eýropa ligasynan keiingi úshinshi deńgeidegi qurlyqtyq klýbtyq fýtbol týrniri. Týrnirge UEFA quramyndaǵy reitingi tómen chempionat komandalary qatysady. Árbir eldiń chempiony burynǵysynsha Chempiondar ligasynda baq synaidy. Al 2-3 oryn alǵan klýbtar jáne Kýbok iegerleri Eýropa ligasyna emes, Konferentsiialar ligasynda dop tebedi.
Aita ketsek, búgin atalǵan týrnirde syrt alańda Qostanaidyń «Tobyly» Horvatiianyń «Haidýk», Qaraǵandynyń «Shahteri» Rýmyniianyń FKSB ( burynǵy ataýy «Stiaýa») klýbtarymen sheberlik baiqasady.
