Eýropa fýtbol qaýymdastyqtary odaǵynyń (ÝEFA) jumys toptary buǵan deiin koronavirýs pandemiiasy saldarynan toqtatylǵan resmi qurlyqtyq jarystardyń týrnirlik kúntizbesiniń túrli jobalaryn usyndy, dep habarlaidy QFF resmi saity.
Beinekonferentsiia túrinde ótken keńeske ÝEFA prezidenti Aleksander Cheferin men Eýropa fýtbol qaýymdastyqtary odaǵynyń bas hatshysy Teodor Teodoris qatysty. ÝEFA quramyna kiretin Eýropa memlekettiri ókilderiniń quramynda Qazaqstan fýtbol federatsiiasynyń bas hatshysy Azamat Aithojin boldy.
Forým qatysýshylary COVID-19 indetiniń órshýi aiaqtalǵan soń eýropalyq fýtbol jarystaryn ótkizý boiynsha ońtaily sheshim tabý úshin qurylǵan eki jumys tobynyń atqarǵan is-sharalarynyń qorytyndylarymen tanysty. Birinshi kezekte kásibi klýbtyq jáne qurama komandalar arasynda ótkiziletin resmi jarystar kúntizbesin iske asyrýdyń túrli merzimderin qarastyratyn nusqalar usynylǵan. ÝEFA múddeli taraptardy bul baǵyttaǵy mindettemelerin ýaqytyly oryndaitynyna sendirdi.
Keńes sońynda joǵary diviziondar chempionattary men ulttyq klýbtar oiyndarynda týrnir maýsymyn aiaǵyna deiin jetkizýge keńes berildi.
Sondai-aq keńeste qozǵalǵan taqyryptar boiynsha resmi sheshimder ÝEFA Atqarýshy komitetiniń aldaǵy beisenbi kúnine josparlaǵan otyrysynan keiin jariialanady.
