Biylǵy jyldyń 1 qyrkúieginen bastap Ulttyq biryńǵai test (UBT) tapsyrmaǵan 20 myńnan astam talapker jumysshy mamandyqtary boiynsha tegin tehnikalyq jáne kásibi oqýǵa jiberiledi.
Eńbek jáne halyqty áleýmettik qorǵaý ministrligi osy baǵyt boiynsha oqytý úshin tizimder qalai qurylatynyn, talapkerlerdi qandai mamandyqtar boiynsha oqytatynyn jáne olar oqýdan keiin qandai múmkindikterge ie bolatynyn túsindirdi, dep habarlaidy QazAqparat tilshisi.
«Eńbek» memlekettik baǵdarlamasy aiasynda 2017 jyldan bastap engizilgen tehnikalyq jáne kásiptik bilimi bar kadrlardy aqysyz daiarlaý tetigi qarastyrylǵan. Bul baǵdarlama jumyssyz jastarǵa, sonyń ishinde 9-11 synyp oqýshylaryna, oqý oryndaryna túspegenderge, kásiptik bilimi joq adamdarǵa, jumys izdeýshilerge jáne az qamtylǵan otbasy múshelerine, sondai-aq halyqtyń áleýmettik osal toptaryndaǵy azamattardyń basqa da sanattaryna arnalǵan. Olardyń qataryna jetimder, múgedekter, kópbalaly jáne turmysy tómen otbasylardyń balalary jatady.
Bul baǵdarlamanyń operatory - QR Bilim jáne ǵylym ministrligi. Sońǵy málimetter boiynsha, biylǵy jyldyń 1 shildesindegi jaǵdai boiynsha 365 tehnikalyq jáne kásiptik bilim berý kolledjinde 32208 adam bilim alýda. Bul baǵdarlama 2021 jylǵa deiin eseptelgen», - dedi Eńbek jáne halyqty áleýmettik qorǵaý ministrliginde.
Biyl baǵdarlamaǵa 21 myńnan astam adam qatysady dep boljanýda. 13 tamyzdaǵy jaǵdai boiynsha 13 300 adamnan ótinish kelip túsken. Qatysýshylardyń tizimderin jasaý úshin óńirlerde 2 myń 62 mobildi top jumys isteýde. Qazaqstan Respýblikasy Eńbek jáne halyqty áleýmettik qorǵaý ministrligi ókilderiniń túsindirgenindei, memlekettik tapsyrys jumyspen qamtýdy úilestirý jáne áleýmettik baǵdarlamalar basqarmalarynyń, óńirlik kásipkerler palatalarynyń ótinimderi negizinde anyqtalady.
«Oqytý dýaldy oqytý elementterimen kúndizgi oqytý formasynda ótedi, onda 40% - teoriia jáne 60% - praktika bolady. Dýaldy oqytý úshin bilim berý uiymdary iri kásiporyndarmen jáne kompaniialarmen kelisimshart jasasady. Óz kezeginde, kásiporyndar Baǵdarlamaǵa qatysýshylarǵa jumys oryndaryn usynady jáne olarǵa tálimgerlerdi bekitedi. TjKB-da (tehnikalyq jáne kásibi bilim berý) oqý uzaqtyǵy 3 jylǵa deiingi bilim berý baǵdarlamalarynda kórsetilgen merzimge sáikes tańdalǵan mamandyq pen biliktilikke bailanysty», - dep atap ótti QR Eńbek jáne halyqty áleýmettik qorǵaý ministrliginde.
Mamandyqtar tizimi aimaqtyq eńbek naryǵynyń qajettilikterin taldaý jáne boljaý negizinde qurylady. Búgingi tańda TjKB-da 171 mamandyq boiynsha kadrlar daiarlanýda. Olardyń qatarynda qyzmet kórsetý, aýyl sharýashylyǵy, kólik, qurylys, jylý-energetika kesheni, aqparattyq-kommýnikatsiialyq tehnologiialar, bazalyq indýstriia, týrizm, saýda, montaj, salalary, paidalaný jáne jóndeý, bailanys, telekommýnikatsiia bar.
Tehnikalyq jáne kásiptik bilim berý bazasynda bilim alýshylarǵa oqý aqysyn tóleý boiynsha memlekettik qoldaý kórsetiledi, bir rettik ystyq tamaqpen, 21 787 teńge mólsherindegi stipendiiamen, jolaqymen qamtamasyz etiledi. Oqytýdy qarjylandyrýdy bilim salasyndaǵy jergilikti atqarýshy organdar júzege asyrady. TjKB-da kadrlardy daiarlaýdyń basqalardan basty aiyrmashylyǵy – tegin bilim beriledi, oqý protsesinde kadrlardy daiarlaýdyń dýaldy modeli qoldanylady, oqytý tek jumys biliktiligi men mamandyqtaryna sáikes júzege asyrylady, baǵdarlamanyń barlyq qatysýshylaryna stipendiia tólenedi.
Oqý oryndary jergilikti ákimdikter bekitken tizimnen anyqtalady. Respýblika boiynsha TjKB-da kadrlardy daiarlaý 365 bilim berý uiymynda júzege asyrylady. Oqýdy bitirgen baǵdarlamanyń barlyq qatysýshylary jumyspen qamtylady. Ol úshin oqýyn aiaqtaǵandardyń tizimi jumyspen qamtý ortalyqtary men «Atameken» kásipkerler palatasyna jiberiledi. Sonymen qatar, oqýdy aiaqtaǵan tulǵalar 500 myń teńgeden astam somaǵa biznes-ideialardy iske asyrýǵa memlekettik granttar alýǵa quqyly, dep atap ótti ministrlik ókilderi.
