Ulttyq biryńǵai testileýdiń beinejazbalary 25 tamyzǵa deiin taldaýdan ótedi. Bul týraly QR Bilim jáne ǵylym vitse-ministri Qýanysh Erǵaliev aitty, dep habarlaidy "Ult aqparat".
«Biyl Ulttyq biryńǵai testileýdiń sońǵy nátijesi tamyz aiynda belgili bolady. Qoldanystaǵy qaǵidalarǵa sáikes, barlyq beinejazbalar osy jylǵy 25 tamyzǵa deiin taldaýdan ótedi. Túsýshi tyiym salynǵan zattardy paidalanǵany anyqtalǵan jaǵdaida testileý nátijeleri joiylatyn bolady jáne bilim berý grantyn taǵaiyndaý sheshiminiń de kúshi joiylady», - dedi ol ministrliktiń apparat jinalysynda.
Vitse-ministrdiń aitýynsha, mundai tájiribe ótken jyldan beri bar. Byltyr 152 test tapsyrýshynyń nátijesi joiylǵan bolatyn.
«Tipti, 100 bilim berý granty iegeri de joǵary oqý oryndarynan dáris alý múmkindiginen aiyrylǵan edi. Sonymen qatar 20 jáne odan joǵary ball aiyrmashylyǵy bar testileýshilerdiń beinejazbalary muqiiat taldanady. Bul beinejazbalardyń barlyǵy bizde saqtaýly», - dedi Qýanysh Erǵaliev.
Testileý barysynda birqatar akademiialyq adaldyqty buzý faktileri oryn alǵan. Atap óter bolsaq, talapkerlerdiń jasyryn kameralarmen kelýi, shaǵyn qulaqqaptardy qoldanýy, 45 ólshemdi krassovka kiip, ultaraqtyń ornyna smartfon salý, meditsinalyq maskalardyń ishki jaǵyna qajetti jazbalar jazý jáne taǵy basqa da ádiletsizdikterge barý oryn aldy», - dep atap ótti Qýanysh Erǵaliev.
