Foto: © Sputnik / Vladislav Vodnev
Biylǵy oqý jylyna 88 myń grant bólindi. Bul týraly QR Ǵylym jáne joǵary bilim vitse-ministri Qýanysh Erǵaliev málim etti, dep habarlaidy QazAqparat.
Atap aitqanda, biyl 18 mamyrda negizgi UBT bastaldy jáne ol 5 shildege deiin jalǵasady.
«Jalpy, UBT-ǵa 166 myń talapker ótinish tapsyrdy. Biyl Memleket basshysy Qasym-Jomart Kemeluly Toqaevtyń bergen tapsyrmasyn oryndaýdy jalǵastyramyz. Bul rette granttyń 60 paiyzy injenerlik-tehnikalyq mamandyqtardy qamtidy. Sondai-aq, tyǵyz ornalasqan, jańa qurylǵan jáne batys aimaqtaryndaǵy jastar úshin de arnaiy grant bólingen. 2023 jyly óńirlik JOO-larǵa bólinetin pedagogikalyq kvota sany artyp, 6280 grant bólindi. Al «Serpin» baǵdarlamasy boiynsha 3653 grant bólindi», - dedi Erǵaliev Ortalyq kommýnikatsiialar qyzmetindegi baspasóz máslihatynda.
Onyń aitýynsha, «Serpin» baǵdarlamasy aiasynda jumys arqyly óteý merzimi biyl qysqardy. Buryn 3 jyl bolsa, qazir 2 jyldy qurap otyr. Sondai-aq, grantty jumys arqyly óteý oqyǵan aimaqta ǵana emes, baǵdarlama aiasynda qamtylǵan basqa aimaqtarǵa da barýǵa bolady.
«Bilim berý granttarynyń jalpy sany 88 myńdy qurady. Onyń ishinde bakalavriatta oqý úshin 73 myń grant, magistratýraǵa – 13 myń, doktorantýraǵa 1890 grant bólinip otyr. Biyl grantqa qujattardy qabyldaý jáne onyń iegerleriniń tizimin jariialaý kúnderine qatysty ózgeris bolmaidy. Iaǵni, 13-20 shilde aralyǵynda grantqa qujattardy qabyldaýdy, al grant iegerleriniń tizimin 10 tamyzǵa deiin jariialaýdy josparlap otyrmyz. Joǵary oryndaryna qabyldaý 25 tamyzǵa deiin júzege asyrylady», - dedi vitse-ministr.
