QR Bilim jáne ǵylym ministrligi UBT-nyń tórtinshi kúnin qorytyndylady.
«UBT-nyń tórtinshi kúni 77 testileý pýnktinde 12 581 adam qatysady dep josparlandy. Onyń 96%-y test tapsyrdy. Erejeni 136 adam buzǵan, bul kórsetkish - úshinshi lektiń qorytyndysymen salystyrǵanda áldeqaida tómen. Toǵyz túlektiń qyzýy kóterildi, olar UBT-ny basqa kúni tapsyra alady», - dep habarlady ministrliktiń baspasóz qyzmeti.
Sonymen birge, emtihandy ótkizý protsesin baqylaýdyń nashar bolýyna bailanysty bilim salasyndaǵy sapany qamtamasyz etý boiynsha aýmaqtyq departamentter men Arnaiy baqylaý toby ókilderiniń usynysymen eki aimaqtaǵy memlekettik komissiia quramynan 20 adam shyǵaryldy.
«Memlekettik komissiialardyń jańa músheleri retinde qoǵam qairatkerleri, oblystyń belsendi muǵalimderi, BAQ jáne úkimettik emes uiymdardyń ókilderi bekitildi. Sondai-aq testileý ótkizý pýnkterindegi baqylaýdy kúsheitý maqsatynda UBT ótkizýde syn-qater múmkin óńirlerge Ulttyq testileý ortalyǵynyń ókilderi jiberiledi», - deidi ministrlik.
Túrkistan oblysynda ornalasqan eki pýnktide (Sháýildir aýyly, Jetisai qalasy) jáne Shyǵys Qazaqstan oblysyndaǵy eki pýnktide (Aiagóz qalasy, Aqsýat aýyly) uialy bailanys signaldaryn tejeýishterdiń isten shyǵýyna jáne beinetransliatsiianyń óshýine bailanysty emtihandar basqa kúnge aýystyryldy.
QR BǴM Ulttyq testileý ortalyǵy direktorynyń orynbasary Naýjan Didarbekovanyń málimdeýinshe, bul pýnkterde talapkerler 27 maýsym (Aiagóz q., Aqsýat a., Sháýildir a.) jáne 2 shilde kúnderi (Jetisai q.) testileýdi tapsyrý múmkindigine ie bolady jáne bilim berý granttaryn taǵaiyndaý konkýrsyna qatysa alady.
Esterińizge salaiyq, biyl mektep bitirýshiler memlekettik emtihandardy tapsyrýdan bosatyldy, talapkerlerge kalkýliator paidalanýǵa ruqsat berildi, sondai-aq testileý ýaqyty uzartyldy.
