QR Bilim jáne ǵylym ministri Ashat Aimaǵambetov Nur-Sultanda S. Seifýllin atyndaǵy Qazaq agrotehnikalyq ýniversiteti bazasyndaǵy UBT ótkizý pýnktinde boldy. Ministr talapkerlerdi aýditoriialarǵa kirgizý protsesin baqylap, olarǵa sáttilik tiledi, dep habarlaidy QazAqparat.
Vedomstvo basshysy talapkerlerdi aýditoriialarǵa kirgizý protsesin baqylap, olarǵa sáttilik tiledi.
«Balalardyń kóńil-kúii óte jaqsy. Meniń oiymsha, atqarylǵan barlyq sharalar – testileý tapsyrý ýaqytyn uzartý, kalkýliatorlardy paidalanýǵa ruqsat etý, mekteptegi qorytyndy emtihandardan bosatý jáne kóptegen tegin baiqaý synaqtary aitarlyqtai septigin tigizdi. Atalǵan pýnktide ata-analar barynsha tártipti saqtap, balalaryn testileý pýnktine ákelgen soń birden ketip otyrdy. Bul óte mańyzdy bolyp tabylady. Elimiz boiynsha tańǵy saǵat 8-de barlyq balalar aýditoriialarǵa kirgizildi, óitkeni balalardy kóshede ustamai, UBT-ny ýaqytynda bastaý mańyzdy. Aýditoriialarda da balalar ádettegiden áldeqaida az jáne balalardyń qaýipsizdigi úshin testileý tapsyrylatyn lekterdiń jalpy sany 5-ten 15-ke deiin uzartyldy. Sanitarlyq talaptar da tolyǵymen saqtalýda» , – dep atap ótti Bilim jáne ǵylym ministri Ashat Aimaǵambetov.
UBT ótkiziletin árbir pýnkte meditsinalyq-sanitarlyq normalarǵa sáikes barlyq testilenýshiler dezinfektsiialaýdyń 5 kezeńinen ótti: dezinfektsiialyq tonnelden ótý, arnaiy dezinfektsiialanǵan kilemshede aiaq kiimderdi zararsyzdandyrý, dene qyzýyn ólsheý, qoldy zararsyzdandyrý suiyqtyǵymen óńdeý, meditsinalyq maskalar berý. Testileýge kirgizý jáne otyrǵyzý kezinde testilenýshiler arasyndaǵy araqashyqtyqtyń keminde 2 metr bolýy qamtamasyz etildi. Árbir aýditoriia bakteritsidtik quraldarmen jáne aýa retsirkýliatorlarymen kezeń-kezeńmen jeldetilip, óńdeletin bolady. Aýditoriialar tek 35%-ǵa deiin toltyrylǵan, árqaisysynda 10-18 adamnan. Ótken jyly bir aýditoriiada ortasha eseppen 50 talapkerden bolǵan.
Eske salsaq, biyl elimiz boiynsha 131 755 adam UBT tapsyrýǵa niet bildirgen, onyń 111 109-y nemese 82% osy oqý jylynyń mektep túlekteri. Jalpy, karantinge qaramastan, ótken jylmen salystyrǵanda UBT tapsyrýǵa niet bildirgen túlekterdiń sany 12%-ǵa artyp otyr.
