Biylǵy Ulttyq biryńǵai testileýde Qazaqstan tarihy men Dúniejúzi tarihy boiynsha naqty datalarǵa qatysty ǵana suraqtar bolady. Bul jaiynda Ulttyq testileý ortalyǵynyń direktory Didar Smaǵulov Facebook-tegi paraqshasynda jazdy, dep habarlaidy "Ult aqparat".
«Ministrdiń tapsyrmasymen tájiribesi, jetistikteri men kásibiligi turǵysynan ázirleýshilerge qoiylatyn talaptar kúsheitildi. Ár test tapsyrmasynyń sapasy boiynsha kelisimshartta qosymsha jaýapkershilik engizilip, josyqsyz ázirleýshilerdiń tizimi (qara tizimge) qurastyryldy. Iaǵni ol tizimge kirý – Ulttyq testileý ortalyǵy jumysyna qatysýdyń kez-kelgen múmkindigin joiady. Sondai-aq, biz ortalyqtyń ishinde de tiisti jumysty júrgizdik. Testologiia boiynsha birneshe oqytý kýrstaryn ótkizip, sarapshylardyń laýazymdyq nusqaýlyqtarynda ár testiniń sapasyna qatysty jaýapkershilikti arttyrdyq. Sonymen qatar testileýdi ázirleýde ortalyq qyzmetkerleriniń týystarynyń qatysýyna tyiym saldyq», - dedi ol.
Ortalyq direktorynyń atap ótýinshe, atalǵan jumystardyń qazirdiń ózinde naqty nátijesi bar. Máselen 2018 jyly apelliatsiia qorytyndysy boiynsha - 101, 2019 jyly - 58, 2020 jyly – 27 test tapsyrmasy qate bolǵany anyqtalǵan. Al 2021 jylǵy naýryz aiyndaǵy UBT nátijeleri boiynsha apelliatsiiada tek 21 test tapsyrmasy qanaǵattandyryldy.
«Onyń ústine jyldan-jylǵa «este saqtaýdy jattyqtyrýǵa» baǵyttalǵan tapsyrmalardy azaityp, fýnktsionaldyq saýattylyqqa, iaǵni alǵan bilimdi is júzinde qoldana bilýge basymdyq berýdemiz. Qazirdiń ózinde mundai tapsyrmalardyń 70 paiyzdan astamy daiyn. Al osy jyldyń jańalyǵy - Qazaqstan tarihy men Dúniejúzi tarihy boiynsha naqty datalardyń jariialanýy. Tek osy datalardan ǵana sandarǵa bailanysty suraqtar kezdesedi. Olardyń jalpy sany ár testilenýshige tek 2-eý-3-ýi ǵana keletindei etip qysqarttyq. UBT- bul jattap alý degen sóz emes!», - dedi Didar Smaǵulov.
