2018 jylǵa arnalǵan Ulttyq biryńǵai testi suraqtary 50 paiyzǵa jańardy. Bul týraly búgin Úkimet úiinde ótken baspasóz máslihatynda Ulttyq testileý ortalyǵynyń direktory Ramazan Álimqulov aitty, dep habarlaidy QazAqparat tilshisi.
«Aǵymdaǵy jyly UBT 15-shi ret óteiin dep otyr. Osy ýaqyttyń aralyǵynda shamamen 1,5 mln túlek Ulttyq biryńǵai testileýge qatysty. Qazirgi ýaqytta 2018 jyldyń UBT-syna daiyndyq shtattyq rejimde júrgizilip jatyr. Barlyq aýditoriia daiyn. Ózderińizde biletindei, biyl onyń formaty ózgermeidi. Úsh mindetti pán bolady: Qazaqstan tarihynan 20, saýatty oqýdan 20 jáne matematikalyq saýattylyqtan 20 jáne tańdap alynǵan 2 pánnen 30 suraqtan», - dedi ol.
Ortalyq basshysynyń aitýynsha, búginde respýblikalyq apelliatsiialyq komissiianyń músheleri iriktep alynǵan. Oǵan 54 adam kirip otyr.
«Apelliatsiia tetigi de saqtalady, eshqandai ózgeris joq. Iaǵni, UBT tapsyrǵan túlek kelesi kúni saǵat 13:00-ge deiin daý týdyrǵan saýalǵa bailanysty jergilikti apelliatsiialyq komissiiaǵa ótinim bere alady. Odan keiin eger jergilikti komissiia daýlasýǵa sebep bar dep sheshetin bolsa, onda materialdardy respýblikalyq komissiiaǵa beredi», - dedi ortalyq basshysy.
Onyń dereginshe, ótken jyly 198 apelliatsiialyq shaǵym tússe, onyń 50 paiyzy tehnikalyq máselelerge qatysty bolǵan. Mazmunyna qatysty 98 másele kóterilip, qanaǵattandyrylǵan.
«Ótken jyly UBT-nyń test tapsyrmalary 40 myń bolsa, sonyń 98 suraǵy, iaǵni 0,02 paiyzy ǵana daý týdyrdy. Álemdik tájiribede 1 paiyzǵa deiin jiberiledi. Biz bul durys kórsetkish dep sanaimyz. Aǵymdaǵy jyly test suraqtarynyń bazasy 50 paiyzǵa jańardy jáne biylǵy UBT-da 80 myń suraq bolady», - dedi ol.
